Misirdə aslanbaşlı tanrıya həsr olunmuş qədim məbəd tapıldı - ÖZƏL

Olaylar.az xəbər verir ki, Misirdə arxeoloqlar 2100 illik tarixi olan və qayadan yonulmuş qədim məbəd aşkar ediblər. Tapıntı Luksordan 200 kilometr şimalda yerləşən Atris bölgəsində baş verib.

Məbəd, e.ə. 170-116-cı illər arasında hökm sürmüş Ptolemey VIII dövrünə aiddir. Məbədin relyeflərində VIII Ptolemeyin   aslan başlı tanrıça Repit və onun oğlu Kolanta qurban təqdim etməsi təsvir olunub.

Repit, məhsuldarlıq tanrısı Min-Ra-nın həyat yoldaşıdır və arxeoloqlar bu məbədin məhz ona həsr edildiyini düşünürlər. Tapıntıya rəhbərlik edən Tübingen Universitetindən professor Kristian Leyts qeyd edib ki, məbəd əşyalarının saxlandığı zalda sonralar amforalar yerləşdirilmişdi.

Məbədin girişində Repit və Min-Ra-nın təsvirləri tapılıb. Ən diqqətçəkən tapıntılardan biri Min-Ra-nın, qədim Misirdə gecələr vaxtı müəyyən etmək üçün istifadə edilən dekans ulduzları ilə əhatə olunmasıdır. Ulduzların insan bədəninə, lakin şahin və ibis kimi heyvan başlarına malik təsvirləri diqqəti çəkir.

Atris bölgəsində 2022-ci ildən bəri davam edən qazıntıların daha çox maraqlı məlumat ortaya çıxaracağı gözlənilir. Bu qədim şəhər artıq on ildən çoxdur ki, intensiv tədqiqatların mərkəzindədir və yeni məbəd tapıntısı bu kompleksin əhəmiyyətli bir hissəsi sayılır.