Rusiya rəsmisi: “ABŞ və Rusiya arasında nüvə mübadiləsi riski mövcuddur” – ÖZƏL

Rusiya ilə ABŞ arasında nüvə zərbələrinin mübadiləsi təhlükəsi reallıqda mövcuddur, lakin Rusiya bu ssenarinin qarşısını almaq üçün bütün mümkün addımları atacaq. 

Olaylar.az xəbər verir ki, bu barədə Rusiya xarici işlər nazirinin müavini Sergey Ryabkov TASS agentliyinə açıqlamasında bildirib.

Ryabkov bu fikirləri Science Time jurnalında dərc olunan bir məqalə fonunda səsləndirib. Jurnalda Rusiya və ABŞ arasında mümkün nüvə zərbələrinin mübadiləsini simulyasiya edən ssenari təqdim olunmuşdu. Diplomat vurğulayıb ki, bu cür modellər ilk dəfə deyil təqdim olunur və bu mövzuda ssenarilər əvvəllər də işlənib hazırlanıb.

Bununla belə, Ryabkov qeyd edib ki, Rusiya bu ehtimalların yalnız nəzəri səviyyədə qalması üçün maksimum səy göstərəcək. O, dünyanın hazırkı mürəkkəb vəziyyətinə baxmayaraq, bu məqsəddə qətiyyətli olduqlarını bildirib.

"Bu cür təhlükənin uzaqlaşdığını demək doğru olmazdı. Təəssüf ki, belə bir təhlükə mövcuddur. Biz bu dağıdıcı ssenarinin reallaşmasının qarşısını almaq üçün mümkün olan hər şeyi edəcəyik. Amma bu məsələdə hər şey yalnız bizdən asılı deyil," - deyə Ryabkov bildirib.

O, əlavə edib ki, Rusiya prezidenti Vladimir Putin artıq nüvə silahının tətbiqi ilə bağlı mümkün ssenariləri açıqlayıb. Bu yanaşmalar ölkənin müvafiq sahədə yenilənmiş siyasi prinsiplərində də əks olunub.