Narişkin: ABŞ və Avropa MDB-də Ukrayna ssenarisini həyata keçirmək istəyir – ÖZƏL

Rusiya Xarici Kəşfiyyat Xidmətinin (SVR) direktoru Sergey Narişkin ABŞ və Qərbi Avropa ölkələrinin Müstəqil Dövlətlər Birliyinə (MDB) daxil olan ölkələrdə millətçi qruplarla əlaqələr qurduğunu bildirib. 

Olaylar.az xəbər verir ki, onun sözlərinə görə, bu cür təmasların məqsədi Ukrayna ssenarisini həmin ölkələrdə də həyata keçirməkdir.

Narişkin əlavə edib ki, ABŞ həmçinin Rusiyada "beşinci kolon" yaratmaq üzərində çalışır və Amerika mübadilə proqramlarının məzunları ilə işini fəallaşdırmağı planlaşdırır.

Jurnalist Pavel Zarubinin sualını cavablandırarkən Narişkin Ukraynanın gələcəyi ilə bağlı fikirlərini də bölüşüb. Onun sözlərinə görə, indiki şəraitdə Ukraynanı heç bir müsbət nəticə gözləmir və Rusiya başladığı yolda dayanmaq niyyətində deyil.

Bu bəyanat Ukraynadakı mövcud gərgin vəziyyətin fonunda, Qərb və Rusiya arasında qarşılıqlı ittihamların artdığı bir zamanda verilib. Rusiya rəhbərliyi Qərbin postsovet məkanında təsirini artırmağa çalışdığını vurğulayır, bu isə beynəlxalq arenada yeni gərginliklərə səbəb ola bilər.