Berbok Ukraynaya uzaq məsafəli silahların təchizinə dəstək verdi- ÖZƏL

Olaylar.az xəbər verir ki, Almaniya xarici işlər naziri Annalena Berbok, Viesbadendə Yaşıl Partiyanın konqresində çıxış edərək Ukraynanı hərbi dəstəkləməkdə davam etməyə və Kiyevə uzaq məsafəli silahların verilməsini dəstəkləməyə çağırıb. Tagesspiegel xəbər verir ki, nazir, Ukrayna Silahlı Qüvvələrinin artıq Böyük Britaniya və Fransa tərəfindən qanadlı raketlər aldığını qeyd edib.

Berbok, "İndi bizim tərəfdaşlarımızın etdiyi şeyi edəcək gücü tapmağımızın vaxtı gəldi," - deyə bildirib. Lakin, onun çıxışında Almaniyanın Taurus qanadlı raketləri ilə bağlı heç bir söz açılmayıb. Bu raketlərin Ukraynaya tədarükünə qarşı Almaniya kansleri Olaf Şolts çıxış edib, yaxın günlərdə Almaniyanın bu raketləri Ukraynaya verməyəcəyini və həmçinin, Ukraynanın Rusiyanın iç bölgələrini hədəf alması üçün qərb silahlarının məhdudiyyətlərinin aradan qaldırılmasına qarşı olduğunu vurğulayıb.

Rusiya Təhlükəsizlik Şurası sədrinin müavini Dmitri Medvedev, Almaniyanın Taurus raketlərini Ukraynaya göndərməsinin vəziyyəti dəyişdirməyəcəyini, lakin münaqişəni "ən təhlükəli mərhələyə" gətirəcəyini bildirib. Rusiya xarici işlər naziri daha əvvəl, Ukraynaya Rusiya daxilindəki əraziləri hədəf almağa icazə verilməsinin, Şimali Atlantika Alyansının birbaşa hərbi münaqişəyə qoşulması kimi qiymətləndiriləcəyini açıqlamışdı.