Hindistanda yeməkdən imtina edən təyyarə sərnişini həbs edilib- ÖZƏL

Dehli Beynəlxalq Hava Limanında 5 saatlıq uçuş zamanı stüardessaların təqdim etdiyi yemək və içkilərdən imtina edən şəxs həbs edilib. 

Olaylar.az "Times Of India"-ya istinadən xəbər verir ki, bir neçə imtinadan sonra təyyarənin kapitanı sərnişinin şübhəli davranışı barədə hava nəqliyyatının idarə edilməsi vasitəsilə təhlükəsizlik xidmətinə məlumat verib.

Təyyarə yerə enən zaman qəribə adam sorğu-sual və yoxlama üçün saxlanılıb. Məlum olub ki, o, düz bağırsağında gizlədilən qızılları yaşıl gömrük dəhlizindən keçirməyə cəhd edib. Qızıllar dörd oval kapsulun içində olub. 

"Sərnişindən 1096,76 qram qızıl götürülüb", - deyə gömrükçülər bildiriblər. 

O, Ciddədən qaçaqmalçılıq yolu ilə qızıl apardığını etiraf etdikdən sonra Gömrük Qanununa əsasən həbs edilib. Səlahiyyətlilər hadisə ilə bağlı araşdırmalara başlayıb.