HƏMAS girovlarla bağlı razılaşmanı müzakirə etmək üçün Qahirəyə nümayəndə heyəti göndərəcək - ÖZƏL

Olaylar.az xəbər verir ki, Fələstinin radikal HƏMAS hərəkatı Qəzza zolağında qrup tərəfindən saxlanılan girovların azad edilməsi ilə bağlı İsrailin təklif etdiyi sazişi müzakirə etmək üçün iyunun 4-də Qahirəyə nümayəndə heyəti göndərəcək.
İki rəsminin sözlərinə görə, HƏMAS keçən həftə ABŞ prezidenti Co Baydenin potensial razılaşma ilə bağlı açıqladığı bəyanata müsbət cavab verib, lakin hərəkat hələ rəsmi cavab verməyib.
Bundan əvvəl ABŞ prezidenti Co Bayden Yaxın Şərq münaqişəsinin həlli üçün hər faza altı həftə olmaqla üç fazalı atəşkəs planını açıqlamışdı. Birinci mərhələdə tam atəşkəs, İsrail qoşunlarının Qəzza qəsəbələrindən çıxarılması və yüzlərlə fələstinli məhbusun İsrail həbsxanalarından azad edilməsi müqabilində HƏMAS tərəfindən saxlanılan girovların azad edilməsi tələb olunur. Bundan əlavə, tərəflər razılığa gələnə qədər atəşkəs rejiminin qüvvədə qalması ilə bu mərhələdə danışıqlara başlamalıdır. İkinci mərhələ hərbçilər də daxil olmaqla, sağ qalan bütün girovların azad edilməsini tələb edir. Üçüncü mərhələdə müharibə nəticəsində dağılmış Qəzza zolağının bərpasına və ölən israillilərin qalıqlarının ailələrinə təhvil verilməsinə başlanılacaq.