FT:Macarıstan bu qanunun qəbulunu gecikdirir- ÖZƏL

"Macarıstan Ukrayna Silahlı Qüvvələrinə kömək məqsədilə Rusiyanın dondurulmuş aktivlərindən əldə olunan gəlirlərin çıxarılmasına imkan verən qanunun qəbulunu gecikdirir".

Olaylar.az xəbər verir ki, bu barədə "Financial Times" qəzeti mənbələrə istinadən yazır.

Materialda qeyd olunur ki, Aİ ölkələri bir neçə aydır ki, Ukrayna üçün mümkün silahların alınmasını müzakirə edirlər. Aİ Belçikanın "Euroclear"dakı hesablarında saxlanılan Rusiya aktivlərinin gəlirlərindən ildə iki milyard avro göndərmək barədə razılığa gəlib.

Lakin yekdil qərarın qəbul edilməli olduğu anda Macarıstan buna qarşı çıxdı. "Hazırda onlar Ukraynaya hərbi dəstəklə bağlı hər şeyi əngəlləyirlər", - həmsöhbətlərdən biri aydınlıq gətirib.

Başqa bir mənbə bildirib ki, dondurulmuş Rusiya aktivlərindən əldə edilən gəlirdən istifadə etmək üçün razılığa gəlmək üçün Aİ rəsmiləri Macarıstana Budapeştin payının silah alışında istifadə olunmayacağı bir razılaşma təklif ediblər.

Diplomatlar ümid edirlər ki, bu problemlərin həlli yolunu iyula qədər tapmaq olar, çünki ilk ödəniş o vaxta planlaşdırılıb.

Xatırladaq ki, mayın 21-də Çexiyanın xarici işlər naziri Yan Lipavski Aİ ölkələrinin Rusiya Federasiyasının dondurulmuş aktivlərindən əldə edilən gəlirlərin Ukrayna Silahlı Qüvvələrinə dəstək məqsədilə istifadə edilməsi planını təsdiqlədiyini bildirmişdi. Lipavskinin sözlərinə görə, 2024-cü ildə üç milyard avronun 90%-i Ukrayna ordusunun ehtiyaclarına yönəldiləcək.

Rusiya Xarici İşlər Nazirliyinin nümayəndəsi Mariya Zaxarova xatırladıb ki, Rusiya Federasiyasının ərazisində Qərb ölkələrinin xeyli miqdarda aktivləri dondurulmuş, oğurlanmış və ya rusiyalı sahibkarların ixtiyarına verilmişdir. Onun sözlərinə görə, əgər kollektiv Qərb Rusiyanın yurisdiksiyasındakı aktivlərini müsadirə etmək qərarına gəlsə, Moskva da buna cavab verəcək.