İqtisadiyyat naziri Göygöldə vətəndaşları qəbul edib
İyulun 20-də İqtisadiyyat naziri Şahin Mustafayev Göygöldə Şəmkir, Goranboy və Göygöl rayonlarından olan vətəndaşları qəbul edib. "Olaylar" xəbər verir ki, qəbula gələnlər güzəştli kreditlərin verilməsi, turizmin inkişafı, heyvandarlıq, bitkiçilik, tikinti materialları istehsalı müəssisəsinin tikintisi, sanatoriya-müalicə fəaliyyətinə lisenziya verilməsi, sosial və s. məsələlərlə bağlı müraciət ediblər.İqtisadiyyat Nazirliyinin aidiyyəti struktur bölmələrinin rəhbərlərinin iştirakı ilə keçirilmiş qəbulda vətəndaşların müraciətləri nazir Şahin Mustafayev tərəfindən diqqətlə dinlənilib, əksər məsələlər yerindəcə həllini tapıb, digər müraciətlərin operativ araşdırılması və qanunvericiliyə uyğun həlli üçün Nazirliyin müvafiq qurumlarına konkret tapşırıqlar verilib.İqtisadiyyat Nazirliyinin səlahiyyətlərinə aid olmayan məsələlərlə bağlı müraciət edən vətəndaşlara ətraflı izahat verilib, bu müraciətlər aidiyyəti strukturlara çatdırılması üçün qeydiyyata alınıb.Eyni zamanda qəbula gələn sahibkarların təklifləri müzakirə edilib, onların fermer təsərrüfatlarının fəaliyyətinin genişləndirilməsi, meyvəçilik, müasir texnologiyalar əsasında mebel istehsalının təşkili, soyuducu anbar kompleksinin tikintisi, mehmanxana kompleksinin genişləndirilməsi və s. sahələr üzrə investisiya layihələrinin güzəştli kreditlər hesabına maliyyələşdirilməsi barədə müvafiq göstərişlər verilib.
İqtisadiyyat naziri Şahin Mustafayev Göygöldə keçirilən vətəndaş qəbulu çərçivəsində Gəncədə fəaliyyət göstərən "NB Satınalma və Ticarət" MMC-nin Süni Mərmər və Qranit İstehsalı Zavodunun tikintisi ilə tanış olub. Qeyd edək ki, innovativ və yüksək texnologiyaların tətbiqi əsasında idxalı əvəz edən və rəqabətqabiliyyətli sənaye məhsulları istehsal edəcək müəssisənin 2019-cu ilin birinci yarımilliyində istifadəyə verilməsi nəzərdə tutulur. Ümumi investisiya dəyəri 46,5 milyon manat olan Zavodun yaradılmasına İqtisadiyyat Nazirliyi tərəfindən investisiya təşviqi sənədi verilib, İqtisadiyyat Nazirliyinin Sahibkarlığa Kömək Milli Fondu tərəfindən 10 milyon manat güzətli kredit ayrılıb. Zavodda İtaliyanın bu sahədə aparıcı şirkətlərinin avadanlıqlarından istifadə olunmaqla ildə 3 milyon m2 süni mərmər, keramik qranit, metlax və digər məhsullar istehsal olunacaqdır. Müəssisənin məhsullarının daxili tələbatının ödənilməsi ilə yanaşı, xarici bazarlara da ixracı nəzərdə tutulur. Zavodun fəaliyyətə başlaması ildə təqribən 30 milyon manatdan çox vəsaitin ölkədən çıxmasının qarşısının alınmasına səbəb olacaqdır. Zavodda 280 yeni iş yeri açılacaq.