Anar Şuşalı: “HvBS Azərbaycan Hərbi Hava Qüvvələrinin çevikliyini ikiqat artıracaq” – ÖZƏL
"Azərbaycan və Türkiyə arasında strateji hərbi əməkdaşlıq növbəti mühüm mərhələyə qədəm qoyur. Bu əməkdaşlığın yeni nümunəsi olaraq Türkiyənin HAVELSAN şirkəti tərəfindən hazırlanmış HvBS (Hava Qüvvələri Məlumat Sistemi) kompleksinin bir hissəsi Azərbaycana təhvil verilib. Artıq Azərbaycan Hərbi Hava Qüvvələrinin idarəetmə infrastrukturuna inteqrasiya edilən sistem hava əməliyyatlarının planlaşdırılması, real vaxt rejimində məlumatların emalı və qərarvermə prosesinin daha çevik təşkilinə xidmət edəcək".
Bu sözləri Olaylar.az-a açıqlamasında hərbi jurnalist Anar Şuşalı deyib. Onun sözlərinə görə, müasir müharibələr göstərir ki, qələbə təkcə yüksək dəqiqlikli silahlardan deyil, məlumatın vaxtında əldə olunması və düzgün idarə edilməsindən də asılıdır. Döyüş meydanında saniyələrlə ölçülən qərarlar bəzən əməliyyatın taleyini müəyyən edir. Məhz bu baxımdan HvBS sistemi Azərbaycan Hərbi Hava Qüvvələrinin rəqəmsal transformasiyasında mühüm addım hesab olunur. Sistem müxtəlif radarlar, müşahidə vasitələri, hava hücumundan müdafiə sistemləri və aviasiya bölmələrindən daxil olan məlumatları vahid idarəetmə platformasında birləşdirir. Bunun nəticəsində komandirlər hava məkanındakı vəziyyəti real vaxt rejimində izləyə, riskləri operativ qiymətləndirə və daha dəqiq qərarlar qəbul edə bilirlər. Məlumat axınının avtomatlaşdırılması isə insan amilindən qaynaqlanan gecikmələri minimuma endirərək əməliyyatların idarə olunmasını daha səmərəli edir. HvBS-nin üstünlükləri yalnız döyüş əməliyyatları ilə məhdudlaşmır. Sistem gündəlik döyüş hazırlığı prosesinə də yeni imkanlar gətirir. Təlim uçuşlarının planlaşdırılması, missiyaların elektron qeydiyyatı, nəticələrin təhlili və arxivləşdirilməsi vahid platforma üzərindən həyata keçiriləcək. Bu isə həm pilotların hazırlıq səviyyəsinin yüksəldilməsinə, həm də texniki heyətin fəaliyyətinin daha səmərəli təşkilinə şərait yaradacaq.
"Hesab edirəm ki, müasir komanda-idarəetmə sistemləri ordunun döyüş qabiliyyətini artıran əsas texnoloji elementlərdən biridir. Belə sistemlər müxtəlif qoşun növləri arasında koordinasiyanı gücləndirir, əməliyyatların planlaşdırılmasını optimallaşdırır və qərarların qəbul edilmə müddətini əhəmiyyətli dərəcədə azaldır. Bu da sürətlə dəyişən döyüş şəraitində mühüm üstünlük yaradır. HvBS sisteminin Azərbaycana təqdim olunması eyni zamanda Azərbaycan-Türkiyə hərbi əməkdaşlığının keyfiyyətcə yeni mərhələyə keçdiyini göstərir. Son illər pilotsuz uçuş aparatları, rabitə sistemləri, birgə hərbi təlimlər və müdafiə sənayesi layihələri üzrə əldə olunan uğurlar artıq rəqəmsal idarəetmə texnologiyalarının da ortaq inkişaf mərhələsinə daxil olduğunu nümayiş etdirir. Bu əməkdaşlıq gələcəkdə komanda-idarəetmə sistemlərinin daha geniş inteqrasiyasına, süni intellekt əsaslı qərar dəstək mexanizmlərinin tətbiqinə, ortaq proqram təminatının hazırlanmasına və NATO standartlarına uyğun idarəetmə imkanlarının genişləndirilməsinə yol aça bilər", - deyə ekspert əlavə edib.
Hərbi jurnalist qeyd edib ki, Azərbaycan Ordusunun son illərdə həyata keçirdiyi modernləşmə siyasəti göstərir ki, əsas məqsəd yalnız müasir silah və texnika əldə etmək deyil, onları vahid rəqəmsal idarəetmə sistemində effektiv şəkildə idarə edə bilən çevik və yüksək texnologiyalı ordu qurmaqdır. HvBS sisteminin tətbiqi də məhz bu strategiyanın tərkib hissəsidir. Bu gün informasiya üstünlüyü döyüş meydanında həlledici amillərdən biri hesab olunur. Məlumatı daha tez toplayan, daha sürətli emal edən və daha düzgün qərar qəbul edən tərəf əməliyyat üstünlüyü qazanır. HvBS kimi müasir idarəetmə sistemlərinin Azərbaycan Hərbi Hava Qüvvələrinin arsenalına daxil edilməsi ordumuzun bu sahədə imkanlarını daha da genişləndirəcək.
Səidə Ramazanova