Ermənistanda qiymət artımı və sosial problemlər parlamentdə kəskin tənqid olunub – ÖZƏL

Olaylar.az xəbər verir ki, Ermənistan Milli Məclisinin avqustun 4-də keçirilən iclasında vitse-spiker seçkisi zamanı müxalifətin "Güclü Ermənistan" blokundan olan deputat İrina Yolyan hakimiyyətin sosial-iqtisadi siyasətini kəskin tənqid edib. Deputat bildirib ki, seçkilər mövcud hakimiyyətdən qurtulmaq vəzifəsini həll edə bilməyib və ölkə bu gün inkişaf proqramları əvəzinə həyati vacib problemlərlə üz-üzə qalıb.

Yolyan hakim "Mülki Müqavilə" partiyasının "hakimiyyət xalqa məxsusdur" iddiasına toxunaraq, yüksək vəzifəli şəxslərin və onların yaxınlarının rifahı artdığı halda, sıravi vətəndaşların sosial vəziyyətinin ağırlaşdığını vurğulayıb. O qeyd edib ki, 2023-cü ildən bəri minimum əməkhaqqında ciddi artım olmasa da, xüsusilə ilkin tələbat mallarında 40-dan 100 faizə qədər kəskin qiymət artımı müşahidə olunur.

Müxalifətçi deputat həmçinin yoxsulluqla mübarizə proqramlarının yetərsiz olduğunu bildirib. Onun sözlərinə görə, son bir ildə yalnız Sünik vilayətində 870-ə yaxın ailə sosial müavinətdən məhrum edilib. Yolyan əlavə edib ki, mülkiyyətçilərdən alınan müəssisələrdə rəhbər vəzifələrə hakim partiyanın nümayəndələri təyin olunur, onlar yüksək məvacib aldığı halda, sıravi fəhlələr çətinliklə dolanırlar.