Rusiya Ukrayna müharibəsi dünyanın və regionun arxitekturasını dəyişməkdədir- ÖZƏL

"Rusiya-Ukrayna müharibəsinin hələki sonu görünmür. Amma nəhəng bir imperiyanın sonu görünür.  Qəhrəman Ukrayna xalqının əzmkarlığı, güclü  bir düşmənə qarşı sözün əsl mənasında döyüşkən ruhu müharibənin gedişinə çox ciddi təsir göstərib". "Olaylar" xəbər verir ki, bunu siyasi ekspert Əkrəm Bəydəmirli deyib: "Nəhayət ki,  ukraynalıların döyüş taktikasını düzgün dəyərləndirən Avropa analitikləri, məsul şəxsləri strateji hədəflərinə çatmaq və Moskvanın təhdidlərindən qurtulmaq üçün Ukraynaya hərtərəfli dəstəklərini əsirgəmirlər. Görünən odur ki, kollektiv Qərbin strateji hədəfi Rusiyanı tamamilə taqətdən salmaq və uzun illər dünya üçün mövcud olmuş təhdidləri aradan qaldırmaqdır. 

Bəlkə də Rusiyanın mərhələlərlə çöküşü ilə bağlı Avrapanın beyin mərkəzlərinin ssenariləri var. Çünki yaralı ayını özbaşına buraxmaq təhlükəlidir. Digər tərəfdən kim qarantiya verər ki, Rusiyanın qorxunc, dağıdıcı silahları  sabah hansısa vilayətdə, muxtar respublikada səhra komandirlərinin əlinə keçməyəcək. O baxımdan belə imperiyaların çöküşü təhlükəli proseslərə yol aça bilər. 

Vaxtılə Osmanlı İmperiyası çökdü. Yerində Türkiyə kimi  müasir tipli dövlət yarandı. Ötən əsrin sonlarında Yuqoslaviya  Federativ Respublikası dağıldı. Yerində 7 müstəqil dövlət yarandı. Rusiyanın necə çökəcəyi, yerində hansı dövlətlərin yaranacağı bəlli deyil.  Amma o bəllidir ki, Rusiya Ukrayna müharibəsi kulminasiya nöqtəsinə çatır.
Qənaətimcə, gücdən düşmüş, parçalanmış, uzun illər hərbi infrastrukturuna qadağa qoyulacaq və nəhayət tam asılı vəziyyətə düşən Rusiyanı görmək Qərbin hədəfləri ola bilər. Digər tərəfdən ehtimal etmək olar ki,  Rusiya hakimiyyətinin içində Qərblə sövdələşməyə gedən qüvvələr  ola bilər. Bütün hallarda proseslər onu göstərir ki, Rusiya Ukrayna müharibəsi dünyanın və regionun arxitekturasını dəyişməkdədir".