Giorgi Qaxariya: "Gürcüstanın ərazi bütövlüyü ticarət mövzusu deyil" – ÖZƏL

Olaylar.az xəbər verir ki, "Qaxariya Gürcüstan üçün" partiyasının lideri Giorgi Qaxariya ölkənin işğal olunmuş ərazilərinin de-fakto ilhaqı ilə bağlı bəyanat yayaraq, Gürcüstanın ərazi bütövlüyünün və suverenliyinin heç bir halda müzakirə və ticarət mövzusu ola bilməyəcəyini bildirib. O, işğal və ilhaqın heç vaxt normallaşdırıla bilməyəcəyini vurğulayıb.

Siyasətçi "Gürcü arzusu" hökumətini Sxinvali regionunun faktiki olaraq Rusiyaya birləşdirilməsi fonunda "xaincəsinə susmaqda" və işğalçı dövlətlə kollaborasionist siyasət yürütməkdə ittiham edib. Qaxariya qeyd edib ki, bu passivlik fonunda Avropa İttifaqının Gürcüstanın işğal olunmuş Abxaziya və Sxinvali regionlarının Suriya tərəfindən qanunsuz tanınmasının ləğvinə yönəlmiş fəal addımları və ardıcıl qeyri-tanıma siyasəti xüsusi önəm daşıyır. Sxinvali rejiminin Aİ-nin bu gedişinə reaksiyasının atılan addımın əhəmiyyətini təsdiqlədiyini bildirən Qaxariya, Gürcüstanın həyati maraqlarını müdafiə etdiklərinə görə beynəlxalq tərəfdaşlara təşəkkürünü bildirib.