Dünya bazarında "Hörmüz" həyəcanı: Yaponiya boğazdan keçmədən nəhəng neft sövdələşməsinə imza atdı

Yaponiya hökuməti Hörmüz boğazındakı gərginliyi nəzərə alaraq, enerji təhlükəsizliyini təmin etmək üçün Birləşmiş Ərəb Əmirliyi (BƏƏ) ilə strateji razılaşma əldə edib.

Musavat.com xəbər verir ki, "Nikkei" nəşrinin yaydığı məlumata görə, Tokio əlavə 20 milyon barrel neftin tədarükü barədə razılığa gəlib.

Bu sövdələşmənin ən mühüm detalı neftin daşınma marşrutudur; belə ki, tədarüklər Hörmüz boğazından yan keçməklə, Oman körfəzində yerləşən Fuceyra limanı vasitəsilə həyata keçiriləcək.

Fuceyra limanı BƏƏ-nin daxili neft yataqları ilə birbaşa boru kəməri vasitəsilə birləşdirildiyi üçün gəmilərin İranın nəzarətində olan riskli boğaz sularına daxil olmasına ehtiyac qalmır.

Regionda vəziyyətin son dərəcə gərgin qaldığı bir vaxtda Yaponiya bu addımla öz iqtisadiyyatını mümkün enerji böhranından sığortalamağa çalışır. Ekspertlər qeyd edirlər ki, ənənəvi dəniz yollarına qoyulan məhdudiyyətlər fonunda Fuceyra limanı dünyanın ən kritik alternativ ixrac qovşağına çevrilib. Yaponiya rəsmiləri bu marşrutun həm vaxt, həm də təhlükəsizlik baxımından əvəzolunmaz olduğunu vurğulayırlar. Bu razılaşma eyni zamanda regional münaqişə tərəflərinə bir mesaj kimi qiymətləndirilir; böyük dövlətlər artıq Hörmüz boğazından asılılığı minimuma endirmək üçün infrastruktur imkanlarını tam gücü ilə işə salırlar. Hazırda 20 milyon barrellik ilk partiyanın yüklənməsi üçün hazırlıq işlərinə başlanılıb.