Azərbaycan- Ukrayna münasibətlərində yeni mərhələ - ÖZƏL

2026-cı ilin 25 aprel tarixində Volodimir Zelenskinin Azərbaycana rəsmi səfəri çərçivəsində keçirilən görüşlər və mətbuata verilən bəyanatlar Azərbaycan-Ukrayna münasibətlərinin inkişafında mühüm mərhələ kimi qiymətləndirilə bilər. Səfər zamanı Azərbaycan Respublikasının Prezidenti İlham Əliyevnin verdiyi bəyanat iki ölkə arasında siyasi, iqtisadi və humanitar əməkdaşlığın genişlənməsinə dair strateji istiqamətləri açıq şəkildə ortaya qoydu.

İlk növbədə, İlham Əliyev öz çıxışında Azərbaycan ilə Ukrayna arasında mövcud olan dostluq və tərəfdaşlıq münasibətlərinin yüksək səviyyədə olduğunu vurğuladı. Bu münasibətlər yalnız diplomatik çərçivə ilə məhdudlaşmır, həm də xalqlar arasında tarixi bağlara və qarşılıqlı hörmətə əsaslanır. Azərbaycan və Ukrayna müxtəlif beynəlxalq platformalarda bir-birinin maraqlarını dəstəkləməklə siyasi etimadı möhkəmləndirmiş ölkələrdir.

Bəyanatda xüsusi yer tutan əsas məsələlərdən biri dövlətlərin suverenliyi və ərazi bütövlüyünün qarşılıqlı dəstəklənməsi idi. Hər iki lider beynəlxalq hüququn prinsiplərinə sadiqliyi bir daha təsdiqlədi. Bu mövqe həm regional sabitlik, həm də beynəlxalq münasibətlər sistemində ədalətli yanaşmanın qorunması baxımından böyük əhəmiyyət daşıyır. Azərbaycanın və Ukraynanın bu məsələdə ortaq mövqedən çıxış etməsi onların strateji tərəfdaşlıq münasibətlərinin əsas sütunlarından biri kimi çıxış edir.

Enerji sahəsində əməkdaşlıq məsələləri də bəyanatda mühüm yer aldı. Azərbaycan Avropanın enerji təhlükəsizliyində mühüm rol oynayan ölkələrdən biri kimi Ukrayna ilə bu sahədə əməkdaşlığın genişləndirilməsinə hazır olduğunu bildirdi. Bu, xüsusilə mövcud geosiyasi şəraitdə Ukraynanın enerji təminatının şaxələndirilməsi baxımından əhəmiyyətli hesab olunur. Azərbaycan qazının və digər enerji resurslarının Ukrayna bazarına çıxış perspektivləri müzakirə mövzularından biri olub.

İqtisadi əməkdaşlıq da liderlər diqqət mərkəzində idi. Ticarət dövriyyəsinin artırılması, yeni investisiya imkanlarının yaradılması və nəqliyyat-logistika layihələrinin inkişafı iki ölkə arasında iqtisadi əlaqələrin genişləndirilməsi üçün əsas istiqamətlər kimi müəyyən edildi. Xüsusilə Orta Dəhliz kimi beynəlxalq nəqliyyat layihələri çərçivəsində əməkdaşlıq imkanları Azərbaycan və Ukraynanın regional tranzit potensialını daha da artırır.

Humanitar sahədə əməkdaşlıq məsələləri də diqqətdən kənarda qalmadı. Təhsil, mədəniyyət və sosial sahələrdə əlaqələrin gücləndirilməsi xalqlar arasında qarşılıqlı anlaşmanın dərinləşdirilməsinə xidmət edir. Bu istiqamətdə tələbə mübadiləsi proqramlarının artırılması, birgə mədəni layihələrin həyata keçirilməsi və humanitar təşəbbüslərin dəstəklənməsi xüsusi əhəmiyyət kəsb edir.

Bəyanatda regional və beynəlxalq təhlükəsizlik məsələləri ətrafında aparılan fikir mübadiləsi də xüsusi qeyd olunmalıdır. Mövcud geosiyasi çağırışlar fonunda Azərbaycan və Ukrayna kimi ölkələrin əməkdaşlığı yalnız ikitərəfli münasibətlər baxımından deyil, həm də daha geniş regional sabitlik kontekstində əhəmiyyətlidir.

Bu əməkdaşlıq müxtəlif beynəlxalq təşkilatlar çərçivəsində də özünü göstərir. Ümumilikdə, İlham Əliyevin mətbuata verdiyi bəyanat göstərir ki, Azərbaycan Ukrayna ilə münasibətləri strateji tərəfdaşlıq səviyyəsində daha da inkişaf etdirmək niyyətindədir. Bu səfər və onun nəticələri iki ölkə arasında əməkdaşlığın yeni mərhələyə qədəm qoyduğunu təsdiqləyir. Mövcud potensial və qarşılıqlı siyasi iradə gələcəkdə Azərbaycan-Ukrayna əlaqələrinin daha da möhkəmlənəcəyini deməyə əsas verir.

Nəticə etibarı ilə, 25 aprel tarixli bu səfər və verilən bəyanatlar yalnız cari siyasi dialoqun göstəricisi deyil, həm də uzunmüddətli əməkdaşlığın strateji xəritəsi kimi çıxış edir. Bu isə həm Azərbaycan, həm də Ukrayna üçün yeni imkanlar və perspektivlər vəd edir.

Anar Alışov

Yeni Azərbaycan Partiyası Yardımlı rayon təşkilatının sədri