Cənab Prezidentin fəaliyyəti mühüm siyasi nümunə kimi diqqət çəkir- ÖZƏL
"Azərbaycan Prezidenti cənab İlham Əliyevi Gernika Sülh Mükafatına layiq görülməsi münasibətilə səmimi qəlbdən təbrik edirəm. Bu mükafat hər hansı adi beynəlxalq təltif çərçivəsindən daha geniş məna daşıyır. O, mürəkkəb geosiyasi şəraitdə sülhün qurulması istiqamətində göstərilən siyasi iradənin, strateji baxışın və dövlət məsuliyyətinin beynəlxalq səviyyədə qəbulunun ifadəsidir. Dünyanın ən mürəkkəb regionlarından birində uzun illər davam edən qarşıdurmanın sona çatdırılması və yeni siyasi reallığın formalaşdırılması böyük liderlik nümunəsi kimi tarixdə xüsusi yer tutur". "Olaylar" xəbər verir ki, bunu Milli Məclisin deputatı Sadiq Qurbanov deyib: "Sülh anlayışı tarixdə hər zaman yüksək dəyər kimi qəbul edilmişdir. Antik dövrdən başlayaraq filosoflar sülhü yalnız müharibənin dayandırılması kimi yox, insan həyatında tarazlığın, hüququn və mənəvi harmoniyanın təmin olunması kimi izah etmişlər. Alman filosofu İmmanuel Kant qeyd edirdi ki, davamlı sülh təsadüfi razılaşmalar nəticəsində yaranmır, o, siyasi iradə və məsuliyyət üzərində qurulur. Bu baxımdan cənab Prezident İlham Əliyevin fəaliyyəti sülhün yalnız diplomatik çağırışlardan ibarət olmadığını, eyni zamanda qətiyyətli dövlət siyasəti ilə mümkün olduğunu göstərir. Tarixdə çoxsaylı siyasi liderlər mövcud münaqişələri uzatmaqla, qeyri-müəyyənliyi qorumaqla öz mövqelərini saxlamışlar. Lakin həqiqi liderlik böhranı idarə etməkdən daha çox, onun həll yolunu yaratmaqla ölçülür. Cənab Prezident İlham Əliyevin fəaliyyəti bu mənada mühüm siyasi nümunə kimi diqqət çəkir. O, uzun illər davam edən münaqişənin nəticələrini dəyişdirərək regionda yeni təhlükəsizlik modeli formalaşdırmışdır. Bu proses yalnız hərbi və siyasi qələbə ilə məhdudlaşmayaraq, eyni zamanda gələcək nəsillər üçün sabit inkişaf imkanlarının yaranmasına xidmət edir. Bu uğurun kökündə Azərbaycan dövlətçilik məktəbinin varisliyi və davamlılığı dayanır. Ümummilli Lider Heydər Əliyev tərəfindən formalaşdırılmış siyasi kurs milli maraqların qorunmasını, dövlət müstəqilliyinin möhkəmləndirilməsini və beynəlxalq münasibətlərdə balanslı yanaşmanı əsas prinsip kimi müəyyən etmişdir. Bu strateji xətt sonrakı mərhələdə cənab Prezident İlham Əliyev tərəfindən yeni geosiyasi şəraitə uyğun şəkildə inkişaf etdirilmişdir. Dövlətçilik ənənəsinin davamlılığı nəticəsində Azərbaycan regionda siyasi təşəbbüs göstərən və yeni reallıq yaradan aktora çevrilmişdir. Fransız filosofu Pol Rikör tarixi yaddaş haqqında danışarkən qeyd edirdi ki, xalqlar yalnız keçmişlərini xatırlamaqla yox, gələcəklərini qurmaqla öz talelərini müəyyən edirlər. Azərbaycanın keçdiyi yol da məhz bu fəlsəfi yanaşmanın nümunəsidir. Münaqişədən sonrakı mərhələdə regionda yeni əməkdaşlıq imkanlarının yaranması, təhlükəsizlik mühitinin dəyişməsi və qarşılıqlı münasibətlərin yeni əsaslar üzərində qurulması sülhün strateji əhəmiyyətini daha aydın göstərir. Gernika adı tarixdə faciə və dağıntının simvolu kimi tanınmışdır. Bu gün həmin adın sülh anlayışı ilə assosiasiya olunması xüsusi rəmzi məna daşıyır. Belə bir mükafatın cənab Prezident İlham Əliyevə təqdim edilməsi beynəlxalq ictimaiyyətin regionda formalaşan yeni siyasi reallığa verdiyi qiymət kimi qəbul edilə bilər. Bu, eyni zamanda sülhün real siyasi nəticələr doğurduğunu göstərən mühüm hadisədir. Bu mükafat həm siyasi liderliyə verilən dəyər, həm də sülhün qorunması istiqamətində göstərilən davamlı fəaliyyətin beynəlxalq səviyyədə tanınması kimi xüsusi əhəmiyyət daşıyır. Bir daha cənab Prezidentimizi ürəkdən təbrik edirəm!"