Paşinyandan revanşistlərə soyuq duş: Xankəndidəki söküntülər beynəlxalq müstəviyə daşınmayacaq
Ermənistanın Baş naziri Nikol Paşinyan Azərbaycanın Xankəndi şəhərində həyata keçirdiyi qanunsuz tikililərin sökülməsi prosesinə ölkə daxilindəki revanşist qüvvələrin göstərdiyi isterik reaksiyaya kəskin cavab verib.
Musavat.com xəbər verir ki, Baş nazir rəsmi İrəvanın bu məsələni beynəlxalq arenada qaldırmaq niyyətində olmadığını və gündəmə gətirməyəcəyini rəsmən bəyan edib. Paşinyan vurğulayıb ki, daxili siyasi qrupların və bəzi radikal dairələrin təzyiqlərinə baxmayaraq, Ermənistan hökuməti bu mövzuda beynəlxalq səviyyədə hər hansı bir iddia ilə çıxış etməyəcək.
Bu açıqlama Ermənistan daxilindəki revanşistlərin növbəti təxribat cəhdlərinin qarşısını alsa da, müxalifət düşərgəsində ciddi narazılıqla qarşılanıb.
Ekspertlər Paşinyanın bu mövqeyini Azərbaycanla sülh prosesini zədələməmək və regiondakı yeni reallıqları qəbul etmək istəyi ilə əlaqələndirirlər.
Baş nazirin bu çıxışı Xankəndidəki yenidənqurma və söküntü işlərinə Ermənistanın rəsmi müdaxilə etməyəcəyinin ən bariz göstəricisi kimi qiymətləndirilir. Hazırda Ermənistan hökuməti bütün diqqətini daxili problemlərə və regionda nəqliyyat kommunikasiyalarının açılmasına yönəltdiyini nümayiş etdirir.