Rusiyada bir həftədə üçüncü neft emalı zavodu BAĞLANDI

Rusiyanın "Rosneft" şirkətinə məxsus Sızran Neft Emalı Zavodu (NEZ) pilotsuz uçuş aparatlarının hücumu nəticəsində texnoloji avadanlıqların zədələnməsi səbəbindən neft emalını müvəqqəti dayandırıb.

Musavat.com "Reuters" agentliyinə istinadən xəbər verir ki, aprelin 18-də baş verən hücum müəssisənin istehsal gücünə ciddi zərbə vurub.

Sahə üzrə mənbələrin məlumatına görə, illik gücü 8,5 milyon ton olan zavodda neftin ilkin emalı üçün nəzərdə tutulan AVT-6 qurğusu qəza rejimində dayandırılıb. Bu qurğu zavodun ümumi istehsal gücünün 71%-ni - sutkada təxminən 17,1 min ton emal həcmini təşkil edir.

Mənbələrdən biri təmir işlərinin uzun sürməyəcəyini, bərpa prosesinin bir və ya iki həftə ərzində tamamlanacağını bildirib:

"Qurğularda ciddi bir zədə yoxdur; sadəcə bəzi köməkçi avadanlıqlar və kommunikasiya xətləri zədələnib. Nasazlıqlar tezliklə aradan qaldırılmalıdır."

"Rosneft"in Samara qrupuna daxil olan və ötən il 800 min ton benzin, 1,5 milyon ton dizel istehsal edən Sızran zavodu, son bir həftə ərzində PUA hücumları səbəbindən fəaliyyəti dayanan üçüncü zavod kimi qeydə alınıb.

Ümumilikdə, ilin əvvəlindən bəri Rusiyanın ən azı altı neft emalı zavodu dron zərbələri səbəbindən yanacaq istehsalını dayandırmalı olub.