Azərbaycan yaşıl enerjiyə keçidi uğurla təmin edir- ÖZƏL

"Azərbaycanın beynəlxalq nüfuzu son illərdə əhəmiyyətli dərəcədə artıb. Prezident İlham Əliyevin fəal diplomatik fəaliyyəti nəticəsində ölkə qlobal enerji dialoqunun əsas iştirakçılarından birinə çevrilib. Müxtəlif ölkələrin liderlərinin Bakıya səfərləri və beynəlxalq tədbirlərin keçirilməsi Azərbaycanın artan rolunun göstəricisidir. Bu dinamika ölkəmizin Avropa üçün strateji tərəfdaş kimi mövqeyini gücləndirir". "Olaylar" xəbər verir ki, bunu YAP Şuşa rayon təşkilatının sədr müavini Leyla Babışova deyib: "Enerji təhlükəsizliyi məsələsi qlobal gündəlikdə xüsusi yer tutur. Bakıda təşkil olunan Cənub Qaz Dəhlizi Məşvərət Şurasının 12-ci və Yaşıl Enerji Məşvərət Şurasının 4-cü iclasları bu sahədə əməkdaşlığın əhəmiyyətini bir daha nümayiş etdirdi. Toplantılar enerji sahəsində birgə fəaliyyətin koordinasiyasını gücləndirdi. Bu platformalar yeni təşəbbüslərin irəli sürülməsinə imkan yaradır.
Cənub Qaz Dəhlizi layihəsi artıq Avropanın enerji təminatında mühüm rol oynayır. Beş ildir fəaliyyət göstərən bu sistem 16 ölkəyə qaz nəql edir. Layihə enerji təhlükəsizliyinin möhkəmləndirilməsində əsas mexanizmlərdən biridir. Azərbaycanın təşəbbüsü ilə həyata keçirilən bu infrastruktur əməkdaşlığın simvoluna çevrilib.
İxracın genişlənməsi ölkənin iqtisadi gücünü artırır. Almaniya və Avstriya bazarlarına daxil olmaq böyük strateji uğurdur. Suriyaya qaz tədarükü isə yeni istiqamətlərin müəyyənləşdirilməsini göstərir. Bu siyasət uzunmüddətli iqtisadi dayanıqlığa xidmət edir.
Eyni zamanda Azərbaycan yaşıl enerji keçidini də uğurla həyata keçirir. Xəzər dənizinin külək potensialı və günəş enerjisi imkanları ölkənin yeni enerji strategiyasının əsasını təşkil edir. Prezident İlham Əliyevin müəyyən etdiyi inkişaf kursu Azərbaycanı həm ənənəvi, həm də alternativ enerji sahəsində lider mövqeyə yüksəldir. Bu strategiya gələcək nəsillər üçün davamlı və təhlükəsiz inkişaf modelidir".