İranda Müvəqqəti Liderlik Şurası öz işinə başlayıb – Pezeşkian
İranda Müvəqqəti Liderlik Şurası öz işinə başlayıb.
Trend-in məlumatına görə, bunu İran prezidenti Məsud Pezeşkian İran vətəndaşlarına video-müraciətində bildirib.
Onun sözlərinə görə, bu şura İran Konstitusiyasının 111-ci maddəsinə əsasən öz işinə başlayıb.
Pezeşkian bildirib ki, İran İslam İnqilabının banisi Ayətulla Seyid Ruhulla Xomeyni və Ali Lider Ayətullah Seyid Əli Xameneinin yolunu davam etdirəcək.
İran prezidenti əlavə edib ki, İran Silahlı Qüvvələri qarşı tərəflərin hərbi bazalarını var-gücü ilə vurmaqdadır.
Pezeşkian İranın Ali Lideri Ayətullah Seyid Əli Xameneinin vəfatı ilə əlaqədar İran xalqına başsağlığı verib.
İran prezidenti vətəndaşları məscidlərə toplaşmağa və küçələrə axışmağa çağırıb.
Xatırladaq ki, fevralın 17-də Vaşinqton və Tehran arasında keçirilən nüvə danışıqlarının ikinci raundu irəliləyişsiz başa çatdıqdan sonra ABŞ İrana yaxın ərazilərdə mövcudluğunu artıraraq Avropa və Yaxın Şərqdəki bazalara 150-dən çox təyyarə yerləşdirib.
Qeyd edək ki, fevralın 26-da Cenevrədə İran və ABŞ arasında İranın nüvə proqramı ilə bağlı danışıqların üçüncü raundu keçirilib. ABŞ Prezidenti Donald Tramp administrasiyasında baş tutan görüş vəziyyətin diplomatik yolla tənzimlənməsi üçün son şans kimi qiymətləndirilirdi. Danışıqlarda konkret razılaşmalar əldə olunmayıb. Tehran uranın zənginləşdirilməsini dayandırmaqdan, nüvə obyektlərini demontaj etməkdən və nüvə proqramının inkişafına müddətsiz məhdudiyyətlər tətbiq etməkdən imtina edib. Fevralın 28-də səhər saatlarında İsrail və ABŞ İrana hərbi hava hücumlarına başlayıb.
İsrail və ABŞ-nin ötən gün həyata keçirilən hərbi hava hücumlarında İranın Ali Lideri Ayətullah Seyid Əli Xamenei və onun ailə üzvləri ölüb.
Eyni zamanda İran Ordusunun Baş Qərargah rəisi general-mayor Əbdülrəhim Musəvi, İran İslam İnqilabı Keşikçilər Korpusunun (SEPAH) baş komandanı Məhəmməd Pakpur, İranın Ali Liderinin müşaviri və Müdafiə Şurasının katibi Əli Şəmxani, müdafiə naziri Əziz Nəsirzadə hərbi hava hücumları zamanı ölüblər.