“Hizbullah” və Husilər prosesə qoşulur: Gürcü politoloq detalları açıqladı

İsrail mediası xəbər verir ki, "Hizbullah" və Yəməndəki Husilər İsrailə qarşı hücumlara başlayacaqları ehtimal olunur.

Husilərin lideri Əbdül-Məlik əl-Husi İran üzərinə həyata keçirilmiş hava zərbələrinə cavab olaraq İsrail və ABŞ-a qarşı genişmiqyaslı müharibəyə qoşulduğunu açıqlayıb. Onun sözlərinə görə, "Ənsar Allah" hərəkatı artıq yalnız yerli müdafiə tədbirləri ilə kifayətlənməyəcək və aktiv hücum fazasına keçəcək.

Globalinfo.az-a danışan gürcüstanlı politoloq Vasili Papava bildirib ki, Husilərin ən effektiv təsir vasitəsi Qırmızı dənizdə, xüsusilə Bab əl-Məndəb boğazında naviqasiyanın nəzarətidir:

"Gözlənilir ki, onlar İsrail, ABŞ və ya Böyük Britaniya ilə əlaqəli ticarət gəmilərinə hücumları bərpa edəcəklər. Dəniz dronları və gəmi əleyhinə raketlərdən istifadə etməklə, dünyanın ən iri yükdaşıma şirkətlərini Sues kanalından imtina etməyə məcbur edə bilərlər ki, bu da qlobal logistika zəncirinin pozulmasına səbəb olar.

Əl-Husinin bəyanatı İsrail şəhərlərinə, xüsusilə Eilat limanına qarşı uzun mənzilli ballistik raketlər və "kamikadze-dronlar"ın intensiv istifadəsini nəzərdə tutur. İsrailin hava müdafiə sistemləri və Qırmızı dənizdə yerləşdirilmiş ABŞ gəmiləri bu təhlükələrlə effektiv mübarizə aparsa da, kütləvi və kombinə edilmiş hücumlar müdafiə sərhədlərinin yüklənməsinə səbəb ola bilər.

Hərbi əməliyyatlarla yanaşı, Husilər kritik infrastruktur obyektlərini, məsələn, Qırmızı dənizdən keçən sualtı internet kabellərini hədəfə ala bilərlər. Bundan əlavə, İranın dəstəyi ilə onlar regiondakı ABŞ bazalarına və enerji obyektlərinə koordinasiyalı kiberhücumlar həyata keçirə bilərlər ki, bu da münaqişənin miqyasını daha da genişləndirəcək".