Aİ ölkələri Avropa Komissiyasını məhkəməyə verməyə hazırlaşır: Qurumlararası səlahiyyət savaşı – ÖZƏL

Avropa İttifaqına (Aİ) üzv dövlətlər Avropa Komissiyasının (AK) Avropa Parlamentinin (AP) səlahiyyətlərini genişləndirmək qərarına qarşı hüquqi müstəvidə addım atmağı planlaşdırır. 

Olaylar.az xəbər verir ki, bu barədə Politico nəşri Aİ Şurasının məktub layihəsinə istinadən məlumat yayıb.
Məsələnin əsasını 2025-ci ilin sentyabrında Avropa Parlamenti ilə Avropa Komissiyası arasında əldə olunmuş çərçivə sazişi təşkil edir. Avropa İttifaqı Şurası bu razılaşmanın Aİ-nin fundamental müqavilələrinə zidd olduğunu və qurumlar arasındakı güc balansını pozduğunu iddia edir.

Mübahisənin əsas səbəbləri nələrdir?

Fevralın 25-də üzv ölkələr tərəfindən yekun mətni təsdiqlənəcək sənəddə Aİ Şurasının "ciddi şübhələri" əks olunub. Şuranın narazılığına səbəb olan əsas bəndlər bunlardır: Avropa Parlamenti deputatlarının beynəlxalq səviyyəli danışıqlarda iştirakına icazə verilməsi; Avropa Komissiyasının ticarət müqavilələri ratifikasiya olunmazdan əvvəl onlara ilkin razılıq vermə səlahiyyətinin parlamentarilər tərəfindən təsdiqlənməsi mexanizmi; Avropa Parlamentinin hər hansı qanun layihəsinin hazırlanması ilə bağlı sorğusu AK tərəfindən yerinə yetirilmədikdə, Komissiyanın bununla bağlı ətraflı əsaslandırma təqdim etmək məcburiyyəti.

"Aİ müqavilələrinə əsasən, Şura Avropa Parlamentindən daha geniş səlahiyyətlərə malikdir, lakin yeni saziş bu balansı sarsıdır." - Sənəd layihəsindən.

Sözügedən çərçivə sazişi 9 sentyabr 2025-ci il tarixində imzalanıb. Sənədin tam hüquqi qüvvəyə minməsi üçün o, 9-12 mart tarixlərində Avropa Parlamentinin plenar iclasında ratifikasiya olunmalı və daha sonra Avropa Komissiyası tərəfindən yenidən imzalanmalıdır.
Əgər tərəflər arasında kompromis əldə olunmasa, Aİ Şurası məsələni Avropa Ədalət Məhkəməsinə daşıya bilər.