Azərbaycan - etibarlı tərəfdaş nümunəsi

Musa Qasımlı,

Azərbaycan Respublikası Milli Məclisi

sədrinin müavini

Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarındakı nitqində cənab Prezidentimiz İlham Əliyevin aşağıdakı fikri təkcə dövlət rəhbərləri deyil, bütövlükdə siyasətlə məşğul olan hər bir şəxsin alacağı dərsdir:

"Etibarlı proqnozlaşdırma və etibarlı tərəfdaşlıq da olmalıdır, çünki tərəfdaşlıqda bütün tərəflər etibarlı olmalıdır."

Gerçəkdən də hər hansı bir işin uğurla alınmasının təməlində hadisə və proseslərin soyuqqanlı, hərtərəfli və dərin təhlili nəticəsində proqnozlaşdırılması və tərəfdaşların etibarlı olması dayanır. Azərbaycan proqnozlaşdırılan, dürüst və etibarlı tərəfdaşdır.

Bunu Avropa İttifaqının energetika və mənzil tikintisi komissarı Dan Yorgensen çıxışında belə etiraf etdi:

"Üç il əvvəl Rusiyanın Ukraynaya tammiqyaslı müdaxiləsi və enerji ticarətinin onun tərəfindən silaha çevrilməsi enerji bazarımızın əsaslarını tam dəyişdi və Avropanın enerji sistemində böyük dəyişikliyə səbəb oldu. Həmin çətin vaxtlarda Azərbaycan Avropa İttifaqı üçün etibarlı enerji tərəfdaşı kimi öz rolunu gücləndirdi. 2020-ci ildə Azərbaycandan Cənub Qaz Dəhlizi vasitəsilə Avropaya qaz nəql olunmağa başladı."

Avropa İttifaqının bəzi ölkələrinin cəhdlərinə baxmayaraq, özünün milli-dövlət maraqlarını əsas götürən Azərbaycan şimal qonşusu ilə münasibətlərə xələl gətirmədən, bütün tərəflərlə dürüst davranaraq bu işi inanılmaz ustalıqla həyata keçirdi. Azərbaycan Avropanı çətin vaxtlarında boğulmaqdan xilas etdi.

Bəs Avropa İttifaqının bəzi ölkələri, məsələn, Fransa necə davrandı və davranır? Burada bir sıra suallar yaranır. Soruşulur: sizin Ermənistan-Azərbaycan sərhədindəki "binokl diplomatiyası" hansı məqsədlərə xidmət edir?

Sadəcə söz deyil, həm də əməli iş olan dürüstlüyü və etibarlı tərəfdaşlığı Azərbaycan dövlət başçısından öyrənmək faydanıza olar. Öyrənmək isə heç vaxt gec deyildir...