Müharibə bitdi, terror davam edir– ÖZƏL

"Ağdamda baş vermiş mina partlayışı daha bir  Azərbaycan vətəndaşının mina terrorunun qurbanına çevrilməsinə səbəb oldu. Bu faciə bir daha göstərir ki, mina təhlükəsi  Azərbaycanın müharibədən sonrakı dövrdə üzləşdiyi ən ciddi problemlərdən biridir".

Bu fikirləri siyasi şərhçi Oqtay Qasımov Olaylar.az-a açıqlamasında bildirib:

"Ermənistan işğal dövründə  Azərbaycan ərazilərində 1 milyondan artıq mina basdırıb və bu minalanmış sahələrin dəqiq xəritələrini təqdim etməyib.  Hal-hazırda  mövcud xəritələrin dəqiqliyi cəmi 20-25% civarında dəyişir ki, bu da olduqca aşağı göstəricidir. Azərbaycanın hazırda Ermənistandan əsas tələblərindən biri minalanmış ərazilərin tam və doğru xəritələrinin verilməsidir.

Eyni zamanda, mina terroru beynəlxalq səviyyədə də qaldırılmalı və bu məsələnin üzərindən sükutla keçilməməlidir. Ermənistan, törətdiyi bu terror aktlarına görə beynəlxalq səviyyədə layiq olduğu təzyiqlə üzləşməlidir. Doğrudur, hazırda beynəlxalq hüququn ikili standartlarla işlədiyinin şahidi oluruq, lakin bu, Azərbaycanı haqlı mübarizəsindən çəkindirməməlidir.

Biz ardıcıl şəkildə Ermənistanın mina terrorunu beynəlxalq ictimaiyyətin diqqətinə çatdırmalı və bu məsələdə davamlı hüquqi və siyasi addımlar atmalıyıq".

Zeynəb Rzayeva