Tramp Amerika iqtisadiyyatında yeniliklər tətbiq etməyi hədəfləyir - ÖZƏL

ABŞ, xaricdən idxal olunan mallara tariflər tətbiq edib. Rusiya siyahıda olmasa da, Ukraynaya 10% rüsum tətbiq edilir. 

Mövzu ilə bağlı politoloq Tural İsmayıov Olaylar.az-a açıqlamasında Trampın  Amerika iqtisadiyyatında yeniliklər tətbiq etməyi hədəflədiyini bildirib:

"Tramp keçmişdə biznes fəaliyyəti ilə məşğul olub. Prezident seçilənə kimi iqtisadiyyat sahəsində aktiv şəkildə böyük səhmləri  olan milyarderlərdən biri kimi tanınıb. Onun birinci hakimiyyəti dövründə verdiyi siqnallar, hələ prezident seçilməmişdən öncə seçki kampaniyası dövründə yenidən prezident seçiləcəyi təqdirdə iqtisadi vizyonun nədən ibarət olacağı ilə bağlı ortaya qoyduğu mövqelər  onu göstərirdi ki, Tramp seçildikdən sonra ABŞ-nin iqtisadi siyasətində müəyyən dəyişikliklər baş verəcək. İstər gömrük rüsumları, istərsə də tariflərlə bağlı özünəməxsus yeniliklər gətirəcəyini vurğulamışdı. Onun İlon Maskı da təyin etdiyi Dövlət Gəlirləri İdarəsini yaratması , iqtisadiyyatla bağlı ifrat qərar kimi qiymətləndirilən addımlar atması əslində Trampın siyasətinin mərkəzində iqtisadi yanaşmanın dayandığını növbəti dəfə nümayiş etdirir. Tramp həm də Rusiya ilə münasibətləri yaxşılaşdırmaq istəyir. Öz hakimiyyəti dövründə siyasi anlamda olduğu kimi, iqtisadi anlamda da soyuq küləklərin aradan qalxmağında maraqlıdır. Ona görə bu rüsumla bağlı Rusiyaya güzəştlər edildi. Hər bir halda Trampın məqsədi Amerika büdcəsini yenidən formalaşdırmaq və Amerika tarixində iqtisadiyyata "Trampsayağı müdaxilə" adlı bir sistem formalaşdırmaqdır".

Zeynəb Mustafazadə