“Rusiya dondurulmuş münaqişə modelindən qaçmağa çalışır” – Ramiyə Məmmədova - ÖZƏL
"Rusiya-Ukrayna müharibəsinin bir-iki günə dayandırılması böyük bir sual altındadır. Çünki Rusiyanın Ukraynaya qarşı olan tələbləri yerinə yetirilməsə, Rusiya bu müharibənin dayandırılmamasına hələ ki rəvac verib. Biz görürük ki, hələ atışmalar da davam edir".
Politoloq Ramiyə Məmmədova bu fikirləri Rusiya-Ukrayna müharibəsindəki son vəziyyəti Olaylar.az-a şərh edərkən bildirib:
"Ukrayna-Rusiya müharibəsi hələ səngimir, tərsinə davam edir. Rusiya və ABŞ-nin artıq ikinci görüşü oldu. Biz burada müşahidə etdik ki, ABŞ Ukrayna-Rusiya savaşının durulmasından daha çox, öz iqtisadi maraqlarından irəli gələn məsələləri həll edirdi. İqtisadi maraqlardan doğan gələcək partnyorluq və gələcək işlər, ümumiyyətlə, dövlət başçılarının bu məsələlərə necə baxdıqları və s müzakirə olunurdu. Ər-Riyadda keçirilən ikinci görüşdə də yenə eyni qaydada iqtisadi məsələlər daha çox gündəmdə olub. Təbii ki, Amerika tərəfindən daxili və xarici siyasətdə Tramp və onun administrasiyası müharibənin durulması üçün danışıqlarda hansısa bir nəticələr əldə etdiyini deyirlər. Ancaq mən bu danışıqların hələ heç bir nəticəsini görmürəm".
Politoloq qeyd edib ki, Trampın tarif siyasəti və bəyanatları Rusiyaya təzyiqdən çox, Ukraynaya iqtisadi maneə yaradır.
"Dünən axşam da biz gördük ki, Tramp tarif proqramını təsdiqlədi və gömrüklərə tariflər qoydu. Rusiya, Belarus , Cənubi Koreya heç biri o siyahıya daxil olmadı. Bu o deməkdir ki, Tramp bugünkü gündə Rusiyanın sanksiyalar altında olmasını nəzərə alaraq, iki böyük bazarın bir-birinə qaynayıb-qarışması, iqtisadi baxımdan alqı-satqı və ticarətlərin dönməsi üçün tariflər uyğulamadı. Müharibə olan Ukraynada isə 10% tarif tətbiq edildi. Ukrayna müharibəsinin dayandırılması üçün Amerika tərəfindən hansısa addımlar atılır. Tramp bir neçə dəfə bəyanatlar verib ki, guya Putin onunla razılaşmasa ya Putini devirə bilər, ya da Rusiyada qalmaqal yarada bilər. Biz görürük ki, bu məsələlər ancaq sözdə qalacaq və buna Rusiyanın reaksiyası da çox gülməli gəlir".
"Atəşkəsin olacağına inanmıram, çünki Rusiya dondurulmuş münaqişə modelindən qaçmağa çalışır" - deyə Ramiyə Məmmədova əlavə edib.
"Ukrayna-Rusiya savaşının yaxın bir zamanda duracağına inanmıram. Təbii ki, birmüddətlik atəşkəs ola bilər, ancaq hesab etmirəm ki, yüksək səviyyədə atəşkəs olsun. Çünki Rusiya atəşkəsə gedib, dondurulmuş müharibə şəraitinə keçmək niyyətində deyil. Çünki o, öz təcrübəsindən çox gözəl bilir ki, Azərbaycanda-Qarabağ münaqişəsi, Gürcüstanda-Abxaziya münaqişəsi, Moldova münaqişəsi dondurulmuş münaqişələrdir və nəticə etibarilə o ölkənin silahlanmasına, güclənməsinə gətirib çıxarır. Ukraynanın güclənməsini heç cür istəmir və Rusiyaya da bu lazım deyil. Ona görə konkret olaraq Kursk vilayətindən Ukraynanın tamamilə çıxarılması məqsədəuyğun qoyulub".
Sonda politoloq bildirib ki, Amerika tərəfi hələ də bir nəticə əldə edə bilməyib və nəticənin nə olacağını gələcəkdə görə bilərik. Ancaq bu gün Ukrayna və Rusiya savaşı tam öz yolu ilə davam edir.
Səidə Ramazanova