ABŞ həm Rusiya, həm də Ukrayna ilə ayrı-ayrılıqda danışıqlar aparır- ÖZƏL

ABŞ prezidentinin Ukrayna və Rusiya üzrə xüsusi nümayəndəsi Keyt Kelloqa görə, Ukraynadakı münaqişənin həlli üzrə məsləhətləşmələrdə atəşkəs razılaşması əldə olunmaq üzrədir.

Bu məsələ ilə bağlı politoloq İlyas Hüseynov Olaylar.az-a açıqlamasında qeyd edib ki, ABŞ həm Rusiya, həm də Ukrayna ilə ayrı-ayrılıqda danışıqlar aparır:

"ABŞ, Rusiya və Ukrayna arasında olan müharibənin həlli üçün əlindən gələni edir. ABŞ tərəfi həm Rusiya, həm də Ukrayna ilə ayrı-ayrılıqda danışıqlar aparır və  məsləhətləşmələr icra olunmaqdadır. Əsas məqsəd qan tökülməsinin qarşısını almaq, hərbi əməliyyatları dayandırmaqdır. Hesab edirəm ki, bu məqsədə çatmaq üçün yaxşı imkanlar var. Qara Dəniz hövzəsində gəmilərə atəş açmamaq,  enerji obyektlərini vurmamaq haqqında razılığın əldə olunması mühüm irəliləyişdir. Bu birbaşa  ABŞ-nin adı ilə bağlıdır. ABŞ  öz  vasitəçilik təklifini irəli sürməyənə qədər belə razılaşmalar yox idi.
 Hesab edirəm ki, bu razılıqları artırmaq mümkündür. Eyni zamanda  Ukraynanın ərazi güzəştlərinə getmək, təhlükəsizlik zəmanətləri, mineral ehtiyatlara görə saziş haqqında fikirlər bir tərəfdən, Rusiyaya qarşı tətbiq edilən sanksiyaları  yumşaltmaq və Rusiya ərazisindəki mineral ehtiyatları istismar etmək  ABŞ-nin planlarına daxildir. Bu məsələlərin ümumi həlli, sülhün bərpasını mümkün edəcək.  ABŞ prezidentinin Ukrayna və Rusiya  üzrə xüsusi nümayəndəsi Keyt Kelloq  münaqişənin həlli naminə atəşkəsin formalaşmasına ümidlidir. Düşünürəm ki, ilkin  mərhələdə  30 günlük atəşkəs razılaşdırıla bilər, sonrakı dövrdə isə bu atəşkəsin nəzarətinə baxılacaq. Əgər tərəflər  əldə olunmuş razılıqları pozmağa cəhd edəcəklərsə, bu və digər formada tədbirlər görülə bilər. Bir tərəfdən  Rusiyaya qarşı,  digər tərəfdən Ukraynaya qarşı atəşkəs razılığının pozulmaması önəmlidir. Eyni zamanda sülhməramlılar məsələsi ciddi müzakirə olunur. Hətta bəzi dövlətlər bu sülhməramlı missiyada iştirak etmək istəmirlər. Amma Avropa öz təhlükəsizliyi üçün sülhməramlıların yaradılmasına daha çox maraq göstərir".

Zeynəb Mustafazadə