İran-Azərbaycan münasibətlərində yeni başlanğıc mümkündür- ÖZƏL

"Düşünürəm ki, iki ölkə arasındakı münasibətlər yenidən normallaşdırılmalıdır. Çünki İranla Azərbaycan arasında münasibətlər uzun müddətdir gərgindir".

Politoloq Turab Rzayev Olaylar.az- a açıqlamasında bu fikirləri qeyd edib:

"Münasibətlər bəzən normallaşır, iqtisadi, siyasi, mədəni əlaqələrdə  yaxınlaşmağa çalışılır. Ancaq yenə də gərginlik artır, iki ölkə arasında münasibətlər gərginləşir. Sanki iki ölkə bir növ bu qırılma nöqtəsindən çox da uzaqlaşıla bilmir. Xüsusən Pezeşkianın  sonuncu etnik məsələlərlə bağlı, İrandakı türk dillilərlə, türk xalqları ilə, azərbaycanlılarla bağlı məsələlərə aktiv münasibət bildirməsi, insan haqlarından danışması, Urmiya gölünün problemlərinə toxunması ilə   demək istəyir ki, burada ən azından ortaq bir nöqtə tapıla bilər. Bundan əvvəl də İran  və Azərbaycan  bütün münasibətləri diplomatik yolla həll etməklə bağlı müəyyən öhdəlik də götürüb. Bu münasibətlər qarşılıqlı inkişaf mərhələsinəmi keçiriləcək, durğunluq dövrümü olacaq, yoxsa yenidən gərginliyəmi çevriləcək? Bunu indidən demək çətindir. Sadəcə yeni bir başlanğıc oldu, daha uğurlu bir əməkdaşlığa doğru bu format irəlilədi. Ola bilsin ki, Rusiya ilə ABŞ arasında olan elə reset hadisəsi kimi burada da bir müddət sonra çox daha böyük bir xaos, qarşıdurma, ölkələrin münasibətlərinin  pozulmasına və Azərbaycana qarşı xüsusilə İranın təxribatlarına şahid ola bilərik.  Ona görə də, indiki halda nəsə demək çətin və tezdir. Ən azından cəhd etmək lazımdır ki, İran bu məsələdə münasibətləri sıfırlamağa, yenidən başlamağa və qırılma nöqtəsindən uzaqlaşmağa artıq ən azından normal qonşuluq münasibətlərinə yaxınlaşmağa hazırdır. İndiki halda İran bizim strateji hərbi müttəfiqimiz olacaq deyil, amma tezliklə ən azından münasibətləri normallaşdırıb, dost, qardaş bir qonşu ölkə ola bilər".

Zeynəb Mustafazadə