Elçin Xalidbəyli: Almaniya prezidentinin səfəri Bakı-Berlin münasibətlərini gücləndirəcək – ÖZƏL
"Almaniya prezidentinin Azərbaycana səfəri yaxın gələcəkdə iki ölkə arasında münasibətlərin inkişafına və əməkdaşlıq-tərəfdaşlıq perspektivlərinin genişlənməsinə müsbət təsir göstərə biləcək faktor sayıla bilər".
Bu fikirləri siyasi şərhçi Elçin Xalidbəyli Azərbaycan-Almaniya münasibətlərini Olaylar.az-a şərh edərkən bildirib:
"Almanya prezidentinin Azərbaycana səfəri təbii ki, müəyyən qalmaqallar və narazılıqlarla başlamışdı. Belə ki, Almanya prezidentinin rəsmi sosial şəbəkə profilində separatçıların qondarma bayrağı təsvir olunmuşdu. Azərbaycan dövlətinin kəskin etirazlarından sonra həm bayrağın fotosu silindi, həm də Azərbaycandan rəsmən üzr istəndi. Bu da onu göstərir ki, Almanya Azərbaycan dövləti ilə çox yaxın münasibətlər qurmaqda maraqlıdır və hansısa separatçıların bayrağına və ya erməni faktoruna görə Azərbaycanla münasibətlərin korlanmasını istəmir. Eyni zamanda Almaniya prezidentinin Bakı səfəri zamanı səsləndirdiyi bəzi fikirlər də rəsmi Berlinin mövqeyi olaraq pozitiv məzmun daşıyır. Belə ki, Almanya prezidenti Ermənistan tərəfindən işğal olunmuş əraziləri nəzərdə tutaraq, "o ərazilərin sizin əraziləriniz olduğunu Almanya dəfələrlə bəyan edib" açıqlamasını verməklə Qarabağın Azərbaycan torpağı olduğunu bəyan etmiş oldu. Bununla da Almanya Azərbaycanın ərazi bütövlüyünü, beynəlxalq hüquq normaları çərçivəsində təsdiqlənmiş sərhədlər üzrə tanıdığını birmənalı şəkildə növbəti dəfə etiraf etdi. Bu da onu göstərir ki, Almanya beynəlxalq hüquq istiqamətində doğru mövqe tutmaqdadır. Azərbaycan da beynəlxalq hüquqa hörmət və riayət edən bir dövlətdir. Bu baxımdan Azərbaycan və Almanya arasında münasibətlərin gələcəkdə də normal istiqamətdə inkişaf etmək perspektivləri kifayət qədər yüksəkdir".
Elçin Xalidbəyli əlavə edib ki, Azərbaycan və Almaniya qarşılıqlı geopolitik, geostrateji və iqtisadi maraqlara əsaslanaraq əməkdaşlığın inkişafında maraqlıdır.
"Eyni zamanda onu da nəzərə almaq lazımdır ki, Azərbaycan-Almanya münasibətlərinin inkişafında hər iki tərəf maraqlıdır.
Çünki bu maraqlar həm geopolitik, həm geostrateji, həm də iqtisadi məzmun daşıyır. Üstəlik Azərbaycan Avropa Birliyinin, eləcə də Almaniyanın enerji təhlükəsizliyi üzrə ən etibarlı tərəfdaşı sayılır və bu da önəmli faktordur. Almaniyanın Azərbaycanda enerji maraqları da var, yəni ikitərəfli iqtisadi münasibətlərin inkişafı üçün bütün pozitiv şərait mövcuddur. Ona görə də hər iki tərəfin bir-birinə doğru müsbət addımlar atması və əlaqələrin, əməkdaşlığın inkişaf etdirilməsi həm Azərbaycana, həm də Almaniyaya olduqca faydalı ola bilər".
Qeyd edək ki, Almaniya Federativ Respublikasının Prezidenti Frank-Valter Ştaynmayer aprelin 1-də Azərbaycan Respublikasına rəsmi səfərə gəlib. Rəsmi səfər aprelin 2-də başa çatıb.