“İrana qarşı hava hücumu gündəmdədir və Tehran buna hazırlaşır” – Zeynal Əmrəliyev – ÖZƏL

"ABŞ ilə danışıqlar olsa da, İran bir tərəfdən də hərbi hazırlıq vəziyyətindədir və əsasən nüvə obyektlərinin, sənaye mərkəzlərinin kamuflaj olunması ilə məşğuldur. Hava məkanını ciddi şəkildə gücləndirmək istiqamətində addımlar atır".

Bu fikirləri politoloq Zeynal Əmrəliyev ABŞ və İran arasındakı hazırkı gərginliyi Olaylar.az-a şərh edərkən bildirib:

"İran başa düşür ki, ona qarşı hava hücumu ola bilər. Quru əməliyyatlarına  çox hazırlaşmır. Əsasən hava hücumu ilə bağlı işlər görür. Bu da təbiidir. Hazırda ABŞ və İsrailin mövqeyi onu göstərir ki, İrana qarşı hava hücumu ola bilər. Körfəz ölkələrində yerləşən ABŞ hərbi bazalarının müşahidə edilməsi də onu göstərir ki, bəli, hava hücumu  ABŞ-də gündəmdədir və əgər istənilən nəticəni verməsə, bu istiqamətdə addımlar atıla bilər".

Politoloq əlavə edib ki, Məsud Pezeşkianın Qərblə dialoq cəhdləri ölkə daxilində mühafizəkarların və ali dini liderin müqaviməti ilə qarşılaşır, bu isə onun siyasi olaraq qurban verilmə riskini artırır.

"Məsud Pezeşkian hakimiyyətə gəldikdə, onun əsas hədəfi məhz Qərblə danışıqlar apararaq məsələni sülh yolu ilə həll etmək idi. Yəni çalışırdılar ki, dialoq formasında Amerika Birləşmiş Ştatlarının və İsraillə birlikdə Qərb dünyasının İrana qarşı mümkün hücumunun qarşısını alsınlar. Ancaq Pezeşkian ölkə daxilində ciddi şəkildə müqavimətlə üzləşdi. Mühafizəkar qruplar bu məsələdə ona qarşı çox ciddi şəkildə dirəniş göstərdilər. Pezeşkianın çıxışından da açıq şəkildə göründü ki, ali dini lider Ayətullah Əli Xamenei də prezidentə qarşı məhz bu qrupları müdafiə edir. Bu, əslində gözlənilən bir məsələdir. Çünki İran rejimi elə Qərbə qarşı qurulub. Yəni yuxarı təbəqənin məhz Qərbə qarşı kampaniya aparması normal bir hadisədir. Rejim faktiki olaraq Qərblə dialoqa qarşı olduğunu deyir. Əgər sabah bu dialoq baş tutmasa, prezident Məsud Pezeşkian bu məsələdə qurbanlıq olaraq təqdim ediləcək. Bu təbiidir. Ali dini lider institutu uzun illərdir məhz bu şəkildə işləyir. Bu şəkildə ölkə daxilində nüfuzunu qoruyub saxlaya bilir".

Əli Zülfüqaroğlu sonda qeyd edib ki, İrana qarşı hava hücumunun baş tutması isə danışıqların formatından asılı olacaq. Çünki Qərb ölkələrində ABŞ və İsrailin hava hücumu ilə bağlı ciddi şəkildə hazırlıqlar gördüyü bildirilir və İran artıq buna qarşı öz mövqelərini gücləndirir.

Səidə Ramazanova