İran hücum riskinə qarşı qabaqlayıcı addımlar atır- Turan Rzayev- ÖZƏL

"İran özünümüdafiədən başqa bir şey etmir. Fərqindədir ki, Amerika Birləşmiş Ştatları və müttəfiqləri bu vəziyyət davam edərsə, İrana müdaxilə edə bilər. İran ehtimal hücum risklərindən sığortalanmaq üçün bu tipli qabaqlayıcı addımlar atır".

Bu sözləri politoloq Turan Rzayev Olaylar.az-a açıqlamasında qeyd edib:

"Bu xəbərdən öncə,  Amerika Birləşmiş Ştatlarının Fars körfəzindəki donanmasına bombardmançı təyyarələrin gətirildiyi də deyildi. Böyük  ehtimal ki, İran nüvə sazişi məsələsinə qaytarılmaq istənilir və maksimum təzyiqdən istifadə ediləcək. Əgər bu məsələ həllini tapmasa və münaqişə hərbi mərhələyə keçsə, Amerika minimum itki ilə müharibəni bitirmək istəyər. Yəni uzunmüddətli bir müharibə nəzərdə tutmurlar. Bunun üçün də nə edəcəklər?  Amerika və müttəfiqləri ki, bura İsrail də daxildir, İranın strateji nöqtələrinə və hərbi bazalarına zərbə vurub, İranı hücuma açıq vəziyyətə salacaqlar və daha sonra az bir itkidən müdaxilə etmək istəyəcəklər. Təbii ki, bu birdəfəlik bir addım deyil. Yəni bu tezliklə gözlənilən bir şey deyil. 2025-ci ilin sonlarına yaxın da ola bilər, 2026 -2027-ci illərdə ola bilər. Əgər açıq hazırlıq gedirsə, birbaşa hücumdan danışmaq üçün tezdir. Yəni, belə bir şey olacaqsa, bunu gizli etmək lazımdır ki, rəqib də buna qarşı cavab addımları ata bilməsin, özünü qoruya bilməsin. Əgər bu baş vermirsə, deməli, Amerikanın  niyyəti hazırda daha çox göz qorxutmaq, xəbərdarlıqdır. Amma, İran bu tutumunda davam edərsə, bu ölkəyə beynəlxalq koalisiyanın müdaxiləsi qaçılmazdır. Biz bu müdaxiləni vaxtilə Amerikanın İraqa müdaxiləsinə bənzədə bilərik".

Zeynəb Mustafazadə