Azərbaycan-Almaniya münasibətlərində müsbət dinamika hökm sürür- ÖZƏL
"Azərbaycan- Almaniya münasibətlərində müsbət dinamika hiss edilir. Xüsusilə son bir neçə il ərzində Azərbaycan və Almaniya qarşılıqlı formada işgüzar əlaqələri daha da dərinləşdirib və münasibətlər sistemi inkişaf edib".
Bu fikirləri politoloq Tural İsmayılov Olaylar.az-a açıqlamasında bildirib:
"Ötən il cənab prezidentin Almaniyaya səfərləri gerçəkləşdi, eyni zamanda, Almaniyanın önəmli iş adamları, biznes investorlarının ölkəmizə səfərləri olub, Azərbaycanın iqtisadi imkanları ilə maraqlanıb və işğaldan azad edilmiş bölgələrimizin iqtisadi potensialı ilə bağlı fikir mübadiləsi aparılıb. Almaniya prezidenti Frank-Valter Ştaynmayer Cənubi Qafqaza səfəri fonunda Azərbaycana gəlməsi, cənab prezident İlham Əliyevlə mətbuata verdiyi ortaq bəyanatlarda Azərbaycanın ərazi bütövlüyü ilə bağlı səsləndirdiyi fikirlər, Qarabağı Azərbaycanın ayrılmaz hissəsi hesab etməsi ilə bağlı Almaniyanın dövlət mövqeyini bir daha təkrarlaması və həmçinin iki ölkənin iqtisadi əlaqələrinin gələcəyi ilə bağlı həm cənab prezident İlham Əliyevin, həm də Almaniya prezidenti Ştaynmayerin mətbuata verdiyi bəyanatlar onu göstərir ki, Azərbaycan -Almaniya münasibətlərində müsbət iqtisadi dinamika hökm sürür. Eyni zamanda, iki ölkə münasibətlərinin gələcək inkişaf perspektivləri baxımından da daha da inkişaf edəcəyi və dövlətlərarası münasibətlər sisteminin bundan sonra iqtisadi əlaqələr kontekstində növbəti mərhələyə daxil olacağı gözlənilir. Hər bir halda Azərbaycanla Almaniyanın iqtisadi əlaqələrinin geniş potensialı mövcuddur. Azərbaycan bu gün Avropa İttifaqının üçdə biri ilə enerji təhlükəsizliyi sahəsində strateji müttəfiqdir və ölkəmizin belə önəmli mövqelərini nəzərə aldıqda Almaniya- Azərbaycan münasibətlərinin də çox geniş, yaxşı perspektivləri mövcuddur".
Zeynəb Mustafazadə