ABŞ-İran nüvə gərginliyi: Hərbi təhlükə artır– ÖZƏL

"İran və ABŞ arasında nüvə sazişi ilə bağlı gərginlik getdikcə artır. Hələ Donald Tramp fevral ayında bildirmişdi ki, İrana qarşı maksimum təzyiq kampaniyası həyata keçirəcək. Trampın bu siyasəti iki əsas məqsədə dayanır. Birincisi, İsrailin təhlükəsizliyini təmin etmək, ikincisi isə  ABŞ-nin Yaxın və Orta Şərqdəki maraqlarını qorumaqdır, çünki İran burada ciddi maneə hesab olunur".

Bu fikirləri siyasi şərhçi Sultan Zahidov Olaylar.az-a açıqlamasında bildirib:

"Bu məsələdə Tramp əvvəlcə diplomatik danışıqlara üstünlük verdiyini bəyan etsə də, hələlik bu danışıqlar heç bir nəticə verməyib. Xatırlatmaq lazımdır ki, İran Donald Trampın məktubuna cavab olaraq ABŞ-yə bir məktub göndərmişdi. Bu məktubda İran açıq şəkildə bildirmişdi ki, ABŞ ilə birbaşa danışıqlara getmək niyyətində deyil. Hazırda isə Tramp müxtəlif təzyiqlər, iqtisadi sanksiyalar və hərbi manevrlərlə İranı güzəştə getməyə məcbur etməyə çalışır.

Bu çərçivədə Tramp ötən həftələrdə  ABŞ ordusuna Yəməndəki hədəflərə qarşı əməliyyat keçirmək əmri verdi. Bu əməliyyatlar hələ də davam edir. Bundan əlavə, ötən günlərdə yayılan məlumata görə,  ABŞ  Hind okeanındakı Diego-Qarcia adasına altı ədəd B-2 strateji bombardmançı təyyarəsi yerləşdirib. Mümkün ehtimallardan biri budur ki, bu təyyarələrin əsas hədəfi İranın nüvə obyektləri ola bilər. Bu vəziyyət isə İranda ciddi narahatlıq doğurub. İranın MEHR agentliyi məlumat yayıb ki, ölkə hava məkanını bağlayıb və ordunu tam döyüş hazırlığı vəziyyətinə gətirib.

Hazırkı mərhələdə ABŞ İranı hərbi güc nümayişi ilə qorxudaraq nüvə sazişi üzrə danışıqlarda daha konstruktiv mövqe tutmağa vadar etmək istəyir. Çünki ABŞ qısa müddətdə bu məsələdən konkret nəticə əldə etməyə çalışır. Bununla yanaşı, İsrail də İranın nüvə sazişini imzalamasına və nüvə imkanlarını məhdudlaşdırmasına çalışır. Əgər bu baş verməsə, gələcək aylarda ABŞ və İsrailin İrana qarşı birgə hərbi addımlar atması real görünür".

Zeynəb Rzayeva