Paşinyanın reytinqi düşür, ancaq alternativi yoxdur– ÖZƏL
"Ermənistanda ən geci 2026-cı ilin yayında parlament seçkiləri keçirilməlidir və artıq siyasi partiyalar bu seçkilərə ciddi şəkildə hazırlaşmağa başlayıblar. Xüsusilə şəhərlərdə müxtəlif mer seçkilərinin keçirilməsi bu hazırlığın daha da qızışdığını göstərir.
Məsələn, Gümrüdə çox qısa müddət əvvəl seçkilər keçirildi. Həmin seçkilərdə Nikol Paşinyanın rəhbərlik etdiyi "Vətəndaş Müqaviləsi" partiyasının namizədi 36 faiz səs topladı. Ancaq şəhərdə tam üstünlük əldə edərək yerli şurada çoxluğa sahib olmaq üçün 51 faiz səs toplaya bilmədi".
Bu fikirləri siyasi şərhçi Kazım Kazımov Olaylar.az-a açıqlamasında bildirib:
"İkinci yeri isə keçmiş merin namizədliyi ilə Ermənistan Kommunist Partiyası tutdu - 20 faiz səs topladı. Bu isə onu göstərir ki, Ermənistanda vahid müxalifət partiyası anlayışı mövcud deyil. Çünki Kommunist Partiyasının ölkə üzrə ciddi bir elektoratı olmasa da, Gümrüdə ikinci yer tuta bildi. Digər tərəfdən, Robert Koçaryanın rəhbərlik etdiyi "Ermənistan Alyansı" burada öz varlığını ciddi şəkildə göstərə bilmədi. Bu isə Ermənistan siyasi arenasında qeyri-stabil vəziyyətin hökm sürdüyünü açıq şəkildə nümayiş etdirir.
Bəs 2026-cı ilə gedən yolda Ermənistanda siyasi vəziyyət necədir? Məlum olduğu kimi, qeyri-müəyyənlik davam edir. Nikol Paşinyanın siyasi reytinqinin getdikcə aşağı düşdüyünü hər kəs bilir. Çünki onun verdiyi heç bir iqtisadi vəd yerinə yetirilməyib. Qərbə inteqrasiya prosesi yalnız bəyanatlardan ibarət qalıb, real addımlar atılmayıb.
Digər tərəfdən, bir zamanlar özünü sülh tərəfdarı kimi göstərən Paşinyan, Azərbaycanın sülh müqaviləsi imzalamaq təklifindən yayınır. O, bilərəkdən və məqsədyönlü şəkildə bu müqavilənin hazırlanmasına mane olur. Buna görə də Ermənistan cəmiyyətində onun sülhü qura biləcək lider obrazı ciddi şəkildə zədələnib.
Yanvar ayında keçirilən bir sorğuda onun reytinqinin 11 faizə qədər düşdüyü qeyd olunurdu. Düzdür, 11 faiz bir qədər aşağı göstərici ola bilər. Çünki bütün uğursuzluqlarına baxmayaraq, Paşinyan hələ də Ermənistanda Koçaryan və digər siyasətçilərlə müqayisədə daha populyar liderdir.
Mən hesab edirəm ki, 2026-cı ilin yayına qədər Ermənistan ya Qərbə inteqrasiya, ya Azərbaycanla sülh müqaviləsi, ya da iqtisadi sahədə ciddi uğur qazana bilməsə, Paşinyanın baş nazir postunda qalması çətin olacaq. Ola bilsin ki, onun partiyası seçkidə birinci olsun, lakin parlamentdə çoxluğu qazana bilməyəcək və koalisiya qurmaq məcburiyyətində qalacaq.
Bəs Paşinyanın yerinə kim gələ bilər? Hələlik Ermənistanda onu əvəz edə biləcək ciddi bir siyasi fiqur yoxdur. Robert Koçaryanın rəhbərlik etdiyi "Ermənistan Alyansı" hazırda parlamentdə ikinci ən böyük qrup olsa da, ölkədə ikinci əsas siyasi qüvvə statusunu qazana bilməyib.
Robert Koçaryan keçmişdə qalmış bir fiqurdur və müasir siyasi arenaya uyğun gəlmir. Çünki o, sadəcə bir qatil kimi düşünə bilir və yalnız zorakılıq yolu ilə siyasət aparmağa öyrəşib. Parlamentdə çıxışları və siyasi fəaliyyəti sadəcə bir maskadan ibarətdir.
Ona görə də, Paşinyan bütün uğursuzluqlarına baxmayaraq, hələ də alternativsiz bir siyasi lider kimi görünür".
Zeynəb Rzayeva