Almaniya Azərbaycanın Avropada əsas ticarət tərəfdaşlarından biridir- ÖZƏL

"Azərbaycanın xarici siyasəti milli maraqların müdafiəsinə, suverenliyin möhkəmləndirilməsinə və ərazi bütövlüyünün qorunmasına yönəlmiş çoxvektorlu və balanslaşdırılmış siyasət kimi xarakterizə olunur". "Olaylar" xəbər verir ki, bunu Milli Məclisin deputatı Rəşad Mahmudov deyib: "Xüsusilə də Avropa İttifaqı (Aİ) ilə enerji təhlükəsizliyi və nəqliyyat layihələri sahəsində iqtisdi əməkdaşlıq uğurla inkişaf edir. Bu baxımdan TANAP və TAP kimi layihələr Azərbaycanın Avropa ilə əlaqələrində vacib elementlərdəndir. Eyni zamanda, ölkəmiz  "Avropanın iqtisadi lokomotivi" adlandırılan Almaniya ilə əlaqələrin inkişafına böyük önəm verir. Sirr deyil ki, Almaniya Azərbaycanın Avropada əsas ticarət tərəfdaşlarından biridir və iki ölkə arasında enerji, sənaye, nəqliyyat, ekologiya və təhsil sahələrində əməkdaşlıq durmadan genişlənir. Azərbaycan ilə Almaniya arasında 1992-ci il fevralın 20-də qurulan diplomatik əlaqələr bu gün də fəal şəkildə inkişaf edir. 2018-ci ildə Almaniyanın sabiq Kansleri Angela Merkel Azərbaycana səfərə gəlmişdi. Bakıya növbəti tarixi səfəri isə aprelin 2-də Almaniya Federativ Respublikasının Prezidenti Frank-Valter Ştaynmayer həyata keçirdi. Bu səfər ikitərəfli münasibətlərin möhkəmləndirilməsi və regional təhlükəsizlik məsələlərinin müzakirəsi baxımından mühüm əhəmiyyət daşıyır".