“Aprel döyüşləri Vətən müharibəsində qələbənin başlanğıcı oldu” – Əli Zülfüqaroğlu – ÖZƏL
"Aprel döyüşləri Vətən müharibəsində əldə edilən qələbənin başlanğıcıdır. Azərbaycan məhz bu döyüş və əldə etdiyi uğurlar nəticəsində Azərbaycan xalqının torpaqlarının işğaldan azad edilməsi ilə bağlı ruh yüksəkliyinin yaranmasına gətirib çıxardı".
Bu fikirləri Ədalət, Hüquq, Demokratiya (ƏHD) Partiyasının İdarə Heyətinin üzvü, politoloq Əli Zülfüqaroğlu Olaylar.az-a açıqlamasında deyib:
"Azərbaycan həm də mesaj verdi ki, heç bir halda torpaqların itirilməsi ilə barışmayacaq və nəyin bahasına olursa olsun öz ərazilərini işğaldan azad edəcək. Eyni zamanda Azərbaycan dörd gün davam edən döyüş zamanı bir sıra strateji yüksəklikləri əldə etdi, düşmənə zərbə vurdu. Bu, Ermənistanda həm də Azərbaycan ordusunun gücü ilə bağlı psixoloji qorxunun yaranmasına gətirib çıxardı. Azərbaycan dörd günlük döyüş zamanı Ermənistan ordusunda olan boşluqları təsdiq etdi. Bundan sonra ordu quruculuğu ilə bağlı daha ciddi addımlar atılmağa başlanıldı və Vətən müharibəsinə qədər olan dövr ərzində Azərbaycan strateji baxışları ilə həm ordu, həm hərbi, həm də diplomatik müstəvidə qələbəyə gedən yolu müəyyən etdi. Bunun nəticəsi olaraq Azərbaycan daha təkmil və daha strateji yanaşma ilə 2020-ci ildə Vətən müharibəsi zamanı tarixi qələbəyə imza atdı. Beləliklə də Azərbaycan nəinki bölgədə, eyni zamanda dünyada öz nüfuzunu bərpa etdi. Azərbaycan qalib xalq olaraq istər ölkə daxilində, istərsə də xaricdə yaşayan soydaşlarının daha əzmlə mübarizə aparmasına təkan verən bir tarixi mərhələnin başlanması ilə nəticələnən bir prosesin əsasını qoydu".
Əli Zülfüqaroğlu qeyd edib ki, Azərbaycan daha güclü dövlət kimi yeni hədəflərə doğru inamla irəliləyir.
"Azərbaycan 2020-ci ildən sonra bütün istiqamətlərdə yeni mərhələnin başlanmasına start verdi. Azərbaycanın artıq yeni hədəfləri var və Azərbaycan artıq münaqişəni bitmiş hesab edir. Kapitulyasiyaya imza atmış bir Ermənistan var və eyni zamanda həm hərbi, həm də diplomatik müstəvidə daha güclü Azərbaycan var. Ermənistanla müqayisəolunmaz dərəcədə güclü bir dövlət olması istər regional, istərsə də beynəlxalq müstəvidə Azərbaycanın daha böyük uğurlar əldə etməsinə zəmin yaradır. Yeni mərhələdə Azərbaycan artıq yeni hədəflər müəyyən edib. Azərbaycan bu yeni hədəflərin əldə olunması ilə bağlı da effektli addımlarla yadda qalacaq".
Səidə Ramazanova