Siyasətə ticarət kimi baxanlar- ÖZƏL

Kiçilən siyasi tacirlərdən min dəfə çox ucalan bir iqtidar mövcuddur

"Təsadüfi siyasi tacirlər və ya ticarətçilər adətən nə tacir, nə də ticarətçi kimi uğur qazana bilməyənlərə deyilir. Çünki onlar siyasətə ticarət kimi baxır, halbuki ticarət siyasətdə olmur, tacir də siyasətçi ola bilmir. Ona görə də siz uğursuzluğun mələyinə çevrilmisiniz. Bu gün dünyada "Xalq Cəbhəsi" adlanan bir qurum yoxdur. Biz bilirik ki, bu partiya bir zamanlar parlamentdə təmsil olunurdu. Lakin müəyyən səbəblərə görə hazırda parlamentdə yer almır. Hazırda adıçəkilən qurumun rəhbərliyi və onun yaxın çevrəsi "Park Ent"də təmsil olunur". "Olaylar" xəbər verir ki, bunu siyasi şərhçi Ramil Hüseynov deyib: "Lakin çox keçmədi ki, partiya bir siyasi qurum olaraq idarəetmə və siyasi davranış qaydalarını düzgün apara bilmədiyinə görə sürətlə mövqelərini itirməyə başladı və cəmiyyətdəki dayaqları kifayət qədər zəiflədi. Daha sonra parçalanmağa başladı, bir neçə yerə bölündü və say baxımından nə qədər kiçik olduqca, siyasi idarəetmə baxımından da bir o qədər zəiflədi.
Cəmiyyətdə mövqeyə malik olduğu dövrdə müəyyən iddialarla çıxış edirdi. O zaman parlament tribunalarından da bunu görür, eşidirdik. Lakin gələcəyə hesablanmış bu iddiaların heç birini tam parçalanmadan öncə həyata keçirə bilmədilər. O zaman indi bu qədər kiçilmişkən yenə də o iddiaların xəyalları ilə yaşayırlar. Burada heç bir məntiq yoxdur. Məntiqsizlik xəstəliyinə tutulanlar artıq cəmiyyətdə tamamilə özlərini ifşa ediblər. Artıq hamı bilir ki, kim kimdir, çünki bu kimlikləri bizə sosial şəbəkələr və müasir texnoloji vasitələr öyrədib.Təbii ki, məlumdur ki, siyasi tacirlər siyasi aləmdə özlərinin şəxsi çıxarları üçün mövcuddurlar və məqsədləri də məhz budur. Zaman-zaman xalqın problemlərini dilə gətirməklə öz çirkin məqsədlərini yerinə yetirməyə çalışan bu təsadüfi tacirlərin siyasətdə artıq heç bir mənası qalmayıb. Digər tərəfdən, kiçilən siyasi tacirlərdən min dəfə çox ucalan bir iqtidar mövcuddur. Bu iqtidar artıq qlobal siyasi aləmdə Azərbaycanın mövqelərini möhkəmləndirib".