“PKK-nın tam ləğvi mümkün deyil, yalnız sima dəyişikliyi ola bilər” – Ramiyə Məmmədova – ÖZƏL
"Abdullah Öcalanın həbsdən çıxıb-çıxmaması sual altındadır. Onun verdiyi bəyanatların hələ nə dərəcədə düzgün olacağı bəlli deyil. Çünki PKK-nın bugünkü gündəki fəaliyyətində ad dəyişikliyi gedib və siyasi arenaya salınması üçün sima dəyişikliyi baş verib"
Bu sözləri Olaylar.az-a açıqlamasında politoloq Ramiyə Məmmədova bildirib:
"Eyni vəziyyət həmçinin Suriyadadır. Çünki Suriyanın hakimiyyətə gələn Əhməd əş-Şaraa hökuməti, özü də PKK-nın və YPG-nin dərindən iştirak edən bir üzvü olub. Onları da siyasi arenaya Türkiyə özü çıxartdı ki, siyasi arenada bir yola çıxa bilsinlər. Nəticə etibarilə görünür ki, arxada və daxildə olan qüvvələrin heç biri dəyişmir. Elə terror təşkilatı olaraq da qalır və bugünkü gündə Öcalanın hələ həbsdən azad olunması məsələsi böyük bir sual altındadır. Çünki onun oradan çıxacağı təqdirdə hansı yollara əl atacağı bilinmir. Bu gün Türkiyədə DEM partiyasında və yeni kürd partiyalarında sima dəyişikliyi əmələ gəlib və bu onların gələcək fəaliyyətdə yeni səslərinin toplanması üçün mühüm addımdır. Türkiyə dövlətində loyallıq yaranıb, ancaq bu o demək deyil ki, Özalan həbsdən çıxacaq və çıxan kimi siyasi fəaliyyətə başlayacaq. Bu Türkiyə toplumunda da birmənalı qarşılanmayacaq. Necə ki, indi də tam qarşılanmır. Təbii ki, millətçilər və ümumiyyətlə türklərin özlərinin PKK ilə sıx əlaqəsi olan bir insanın siyasətdə olmasını birmənalı olaraq qarşılaması müşküldür. Ancaq bu gün hələ Özalan həbsdədir və onun ətrafında olan DEM partiyasında bir az loyallıq yaranıb. Onların da gələcəkdə verəcəyi qərarların nəyə gətirib çıxaracağı hələ tam bəlli deyil. Çünki onlar hər dəfə yeni bəyanatlarla çıxış edirlər".
Politoloqun sözlərinə görə, PKK-nın tam ləğvi mümkün deyil, yalnız sima dəyişikliyi baş verə bilər.
"Suriyada da eyni məsələdir. PKK-nın ləğv olunması mümkün deyil. YPG-nin və PKK-nın bir qolu yoxdur, bir neçə qolu var. Ona görə də onların hamısını bir yerə toplaya bilmirlər və bu gün Suriya rəhbərliyində olan Əhməd əş-Şaraa bunu toplamağa çalışır ki, hamısı bir hakimiyyət üzərindən işləsinlər. Ancaq bu da hələ mümkün deyil. Çünki hər qrupun özünün özünə aid olan siyasəti və istəkləri var və buna da hələ Suriyada nail ola bilmirlər. Eyni vəziyyət hələ ki, Türkiyədə də bir növ gedir. Çünki Türkiyədə kürd partiyası deyil, bir neçə kürd partiyası var və təbii ki, onların əlinin altında olan dəstələr var ki, bunların hər birinin özlərinə uyğun olan fikirləri və istəkləri var. Təbii ki, Türkiyə dövləti çalışır ki, hamısını bir yerə toplasın. Amma biz görürük ki, hələ buna da bir az çətinliklərlə nail olurlar. Təbii ki, PKK-nın tamamən ləğv olunması sadəcə sima dəyişikliyi ilə mümkün ola bilər".
Səidə Ramazanova