Koçaryan: "Rusiya Azərbaycana silah satmasa, başqa ölkədən alacaq" – ÖZƏL

Olaylar.az xəbər verir ki, Ermənistanın ikinci prezidenti Robert Koçaryan bazar ertəsi keçirdiyi mətbuat konfransında Kollektiv Təhlükəsizlik Müqaviləsi Təşkilatının (KTMT) silah satışına məhdudiyyət qoymadığını və buna görə də Rusiyanın Azərbaycana silah satmasının KTMT Nizamnaməsinə zidd olmadığını bildirib.

"O silahları niyə satıb? Bəs niyə eyni sualı İsrailə, Türkiyəyə və digər ölkələrə vermirsiniz? Hesab edilir ki, Rusiya bizim dostumuzdur və buna görə də Azərbaycana silah satmamalıdır.

Rusiyanın baxış bucağından baxın. Onlar deyirlər ki, hərbi büdcə var, orada nəzərdə tutulan məbləğ var. Məndən almazlarsa, başqasından alacaqlar. Bizim üçün vacib olan odur ki, silahlar Rusiyada istehsal edilməsin, yoxsa orada silah olmasın?

Hər şeyi qara və ağ rənglərdə görməyə ehtiyac yoxdur. Ermənistana bildirilməli idi ki, 'filan silahlar Azərbaycana satılıb, bu balansı poza bilər və biz bu sövdələşmənin yaratdığı təhdidlərin qarşısını almaq üçün kompensasiya istəyirik'. Bunu etmisiniz, ya yox? Bildiyimə görə, ediblər. Mən olsaydım, edərdim. Amma 'niyə satdılar?' sualını vermək düzgün deyil. Əksinə, Rusiyadan silah almaq müttəfiqinizin təsirini artırır. Tutaq ki, biz silahı Pakistandan alsaydıq, bizim üçün nə dəyişəcəkdi?

Ermənistan deməlidir ki, 'balanssızlıq müharibəyə gətirib çıxarır və bu təhlükəni neytrallaşdırmaq üçün bizə bu və ya digər silah lazımdır'. Azərbaycana kiçik bir partiya silah satılıb. Biz də işlək vəziyyətdə olan, pulsuz silahlar əldə etdik. İstehsal tarixinə gəlincə, Ukraynada nəyə qarşı döyüşdüklərinə baxın. Onlar bizə yaxşı silahlar veriblər," - Koçaryan vurğulayıb.