Bu qədər silah almasına baxmayaraq, Ermənistanın hərbi kadr çatışmazlığı var - ÖZƏL
"Ermənistanın son dönəmlərdə xarici ölkələrdən silah alışını artırması, şübhəsiz, onun müharibəyə hazırlaşması versiyalarını da gündəmə gətirir".
Bunu Olaylar.az-a açıqlamasında politoloq Turan Rzayev deyib.
"Xüsusilə Fransa, Hindistan, İran, Rusiya kimi ölkələrdən aktiv şəkildə Ermənistana silah yardımı edilir. Son dəfə Yunanıstandan S-300 sistemləri Ermənistana gətirildi və bu, əslində bir daha göstərir ki, Ermənistan tərəfi sülh prosesinə baxmayaraq, bu qədər uğurlu nəticələrin əldə edilməsinə baxmayaraq, regionda gərginliyi artırmaqda maraqlıdır. Düzdür, Ermənistanın Azərbaycanla müharibədə qələbə qazanacağına ehtimal vermirəm. Çünki hər şeydən öncə bu qədər silah almasına baxmayaraq, Ermənistanın hərbi baxımdan kadr çatışmazlığı var. Bu da azmış kimi səfərbərliyə cəlbedici qüvvəsi də azdır. Amma bu tip müharibələrə adətən revanşist müharibələr və yaxud diplomatik siyasi müharibələr deyirlər. Yəni məğlub tərəf özünü qalib göstərmək və daxili auditoriyada nüfuzu artırmaq üçün bu tipli müharibə variantlarına və gərginliklərə əl ata bilirlər.
Ermənistanı indiki məqamda müharibəyə sövq edən başlıca faktorlar Fransa kimi ölkələrdir. Aydın məsələdir ki, Ukrayna müharibəsində Qərb istədiyini əldə edə bilmir və ona görə də indiki məqamda Ermənistanı müharibəyə sövq etməyə çalışırlar. Təbii ki, burada bütövlükdə Qərbin özünü deyə bilmərik, Fransa və onun yanında olan Qərb ölkələrini demək lazımdır. Qərb ölkələri arasında Avropa İttifaqı daxilində də fikir ayrılıqları var. Fransanın başçılıq etdiyi blok daha çox bu tipli müharibələrdə maraqlıdır və Ermənistanla bir növ müharibəyə sövq edərək Cənubi Qafqazda regionu yenidən qan gölünə çevirməyə çalışırlar.
Təbii ki, belə müharibə Ermənistana heç bir müsbət divident verə bilməz. Əksinə, bu, Ermənistan üçün fəlakətlə nəticələnə bilər. Onsuz da son müharibələrdən və anti-terror tədbirlərindən sonra Ermənistandakı iqtisadi-sosial və demokratik vəziyyət olduqca pis idi. Yeni bir müharibəyə başlamaq istəsələr, bu, onlar üçün daha da böyük bir problemə gətirib çıxara və ən önəmlisi bu, sülh prosesini gerilədə bilər. Ermənistan bu tipli məsələlərdən çəkinməli, sülh prosesinin gündəliyinə sadiq qalmalı, silahlanmanı dayandırmalıdır. Bizim müharibə etmək niyyətimiz yoxdur. Amma Ermənistanın belə bir fəaliyyətini müşahidə edərsək və yaxud cəhdlər varsa, ən sərt şəkildə cavab verilə bilər.
Faktiki olaraq COP29-a Ermənistan tərəfi dəvət edildi. Əgər gəlsəydilər, sülh üçün tarixi bir fürsət əldə etmiş olardılar. Amma gəlmədilər, əməlləri bir tərəfə qalsın, mənfi və müsbət bir şey demədilər. Bu, istər-istəməz hörmətsizlikdir və sülh üçün böyük bir fürsətin əldən verilməsi deməkdir. Azərbaycan yenə sülhdə maraqlı olduğunu deyir, amma Ermənistan tərəfi silahlanacaq və gərginliyi artıracaqsa, o zaman artıq bu məsuliyyəti də rəsmi İrəvan və onun havadarları daşıyır".