20 yanvar 1990-cı il - müasir qəhrəmanlıq tariximizin başlanğıcı

Müstəqillik və milli azadlığımız  uğrunda çıxdığımız yol asan olmadı.
Ağır, çətin lakin  şərəflə başlayan  yoldan - 1990-cı ilin 20 yanvarından bizi 32 il ayırır.  Tariximizə həm faciəsi, həm də rəşadəti ilə yazılan 20 yanvara bu günün prizmasından yanaşanda  o gecənin nə qədər mühüm bir hadisə olduğu bir daha aydın görünür. Xalqımızın imperiya girovundan qırılmaq israrı ilə yola çıxdığı azadlıq mücadiləsində yazdığı qəhrəmanlıq salnaməsinin əhəmiyyəti zaman keçdikcə  daha da dərinləşir, siyasi-ictimai yükü, çəkisi daha da artır. Nə qədər hüznlü bir gün olsa da müstəqilliyimiz, azadlığımız, hüriyyətimiz 20 yanvar  hüznünün fövqündədir. İllər bir birini əvəz etdikcə bu əzəmətə, bu hürriyyətə sahib çıxan  Azərbaycan şəhidlərin ruhunu sarsılmaz  qüdrəti,  möhkəmlənən mövqeyi, gücü-qalibiyyəti ilə daha da şad edir. Canları, qanları bahasına rus imperiyasına meydan oxuyan qəhrəman şəhidlərin ruhu bu gün azad Qarabağın üzərində dolaşaraq hüzur tapır.  20 yanvar 1990-cı ildə başlayan müasir tarixin qəhrəmanlıq salnaməsi  30 ilə yaxın davam edən diplomatik və hərbi savaş, bütün cəbhələrdə aparılan mübarizələrin nəticəsində 8 noyabr  Zəfəri  yaddaşlara yazıldı. Tarixi qürurumuzu, hüriyyətimizi, bütövlüyümüzü bizə qaytaran Şəhidlərimizi, günahsız 20 yanvar qurbanlarının əziz xatirələrini  dərin ehtiramla yad edirik. Ruhları şad olsun! 

Mətanət Ağamirli, Əməkdar jurnalist