Azərbaycan-Gürcüstan münasibətləri regional təhlükəsizliyin təmin olunmasında əhəmiyyətli rol oynayır

Azərbaycan bir qayda olaraq yaxın-uzaq qonşuları ilə dostluq-qardaşlıq, qarşılıqlı faydalı əməkdaşlıq münasibətlərinə üstünlük verir. Məhz bu uğurlu xarici siyasət kursu və strategiyanın nəticəsidir ki, günümüzdə dünyanın əksər ölkələri Cənubi Qafqaz regionunda Azərbaycanla əməkdaşlığa daha çox üstünlük verirlər.

Rəsmi Bakının yerləşdiyi coğrafiyadan kənar olmaqla yanaşı, Ermənistan xaric, region ölkələri ilə də çox normal əlaqələri, əməkdaşlığı mövcuddur. Bu sırada qonşu Gürcüstanla əlaqələrə xüsusi diqqət yetirmək lazımdır. Son illərdə artan qarşılıqlı yüksək səviyyəli səfərlər bu əlaqələri daha da inkişaf etdirib, yeni bir mərhələyə çatdırıb. Bu günlərdə Azərbaycan Respublikasının Prezidenti İlham Əliyevin bu ölkəyə işgüzar səfər etməsi də Bakı-Tiflis əlaqələrinin inkişafı baxımından mühüm əhəmiyyət kəsb edirdi.

Dövlət başçısının sözügedən səfərinə diqqət çəkən Milli Məclisin deputatı Nəsib Məhəməliyev deyib ki,  oktyabr ayının 24-də Prezident İlham Əliyevin Gürcüstana işgüzar səfəri, ölkələrimiz arasında diplomatik münasibətlərin qurulmasının 30 illiyinə təsadüf edirdi. Millət vəkilinin sözlərinə görə, 30 il tarix üçün böyük zaman olmasa da, Gürcüstanla birlikdə qət etdiyimiz yol, həyata keçirilən transmilli layihələr   əsrlərə bərabərdir: "Bakı-Tbilisi-Ceyhan, Bakı-Supsa neft, Bakı-Tbilisi-Ərzurum qaz kəmərləri, Bakı-Tbilisi-Qars dəmiryolu, inşa olunmuş, tarixi İpək Yolunun bərpası nəticəsində avtomobil daşımalarının həcmi dəfələrlə artmışdır. İldən ilə iki dövlət arasında iqtisadi, humanitar əməkdaşlıq, genişlənir, ticarət dövriyəsi artır".

Nəsib Məhəməliyev diqqətə çatdırıb ki, Prezident İlham Əliyevin növbəti səfəri, yeni dövrün çağırışlarına uyğun olaraq, Azərbaycan və Gürcüstan dövlətlərinin qarşısında duran aktual problemlərin həllinə, əlaqələrimizin daha da inkişafına xidmət edəcəkdir: "Yeni dövrün çağırışları dedikdə, Rusiya-Ukrayna müharibəsi nəticəsində Çini, bəzi Asiya ölkələrini Avropa Birliyi ilə birləşdirən və Azərbaycanla Gürcüstandan keçən Orta Xətt marşrutunun inkişaf etdirilməsini nəzərdə tuturam. Ölkə başçımız Ələt dəniz limanının aşırma qabiliyyətinin 25 milyon tona çatdırılacağını, Axalkalaki-Qars dəmiryolunun imkanlarının artırılması üçün maliyyə vəsaitinin ayrılacağını bəyan etdi. Təbii, paralel olaraq, sərhəd-keçid məntəqələrinin də buraxılış qabiliyyəti artırılmalı, hər hansı ləngimələr olmadan, maksimum sürətlə, qatarların ötürülməsi təmin olunmalıdır".

Deputat hesab edir ki,  digər aktual məsələ isə, Avropa İttifaqı ilə Azərbaycan arasında imzalanmış enerji layihələrinin icrasıdır: "Gələn ildən Bakı-Tbilisi-Ceyhan kəməri ilə ixrac neftinin həcmi artırılacaq, Bakı-Supsanın imkanlarından istifadə ediləcəkdir. Qaz nəqlinin iki dəfə artırılması ilə yanaşı, elektrik enerjisinin ixracı və xüsusilə, Xəzər dənizinin və işğaldan azad olunmuş ərazilərdə bərpa olunan enerji potensialından səmərəli istifadə edilməsidir. Burada da  Azərbaycanın dünya bazarına çıxışında Gürcüstan, tranzit ölkə olaraq əhəmiyyətli iqtisadi dividentlər əldə edəcəkdir. Bütün bu nailiyyətlərin kökündə  mehriban qonşuluq, qarşılıqlı hörmət, liderlər arasında formalaşmış səmimi münasibət durur".

Nəsib Məhəməliyev sonda onu da deyib ki, bu gün Azərbaycan və Gürcüstan xalqları 30 il ərzində əldə olunmuş nailiyyətlərin bəhrəsini görür və gələcəyə hesablanmış yeni layihələr üzərində işləyirlər: "Əfsuslar olsun ki, digər qonşumuz Ermənistanla münasibətlərdə 30 illik düşmənçilik, qətllər, dağıdıcılıq, milyona yaxın soydaşımızın faciəsindən başqa xatırlanası müsbət heç nə yoxdur. Erməni təbliğat maşını uzun illərdi ki, Azərbaycanlılarla birgə yaşayışın qeyri-mümkünlüyü barədə yalanlar yayır, Qarabağ münaqişəsinə dini don geyindirirdilər. Ancaq, Gürcüstanın və bir çox digər xristian ölkələrinin timsalında dünyaya sübut etdik ki, Azərbaycan multikultural dövlətdir və istənilən ölkə ilə ən yüksək səviyyədə əməkdaşlığa hazırdır. Strateji xarakter daşıyan Azərbaycan-Gürcüstan münasibətləri xalqlarımızı bir-birinə daha da yaxınlaşdırır, regional təhlükəsizliyin təmin olunmasında əhəmiyyətli rol oynayır".

Süleyman