“Azərbaycana qarşı bütün haqsız ittihamlara yox deyirik”- Çingiz Qənizadə
Oktyabrın 4-də Prezident İlham Əliyevin işğaldan azad olunmuş Cəbrayıla səfəri ilə bağlı açıqlama verən keçmiş millət vəkili Çingiz Qənizadə bildirib ki, 2020-ci il sentyabrın 20-nə qədər ermənilər işğal olunmuş ərazilərimizə, əhalinin daha çox məskunlaşdığı Tərtər şəhəri və onun ətrafındakı kəndlərə, həmçinin Ağcabədi rayonu və onun kəndlərinə, Qarabağın digər bölgələrinə mərmilər yağdırmağa başlamışdı. Odur ki, Azərbaycanın Ali Baş Komandanı orduya əks-hücuma keçmək əmri verdi. Sentyabrın 27-də başlayan Vətən savaşında ordumuz bir neçə gün ərzində müəyyən kəndləri işğaldan azad etdi. Oktyabrın 4-də ordumuz 1 həftə ərzində ilk dəfə idi ki, Cəbrayılı, rayon mərkəzini və şəhərini tamamilə işğaldan azad etdi. Həmən gün cənab Prezident 9 kəndin və Cəbrayılın işğaldan azad olunduğunu söylədi. Bütün Azərbaycan xalqı uğurlu əməliyyatların bu sonluqla başa çatmasını sevinc və göz yaşları içərisində qarşıladı.
"Sual yarana bilər ki, Cəbrayıl rayonunun işğaldan azad olunması bizə hansı üstünlükləri verə bilər? Birincisi, İranla sərhəd boyu, işğal olunmuş ərazilərimizin artıq Azərbaycan ordusu tərəfindən azad olunması istiqamətində çox gözəl perspektivlər yaratdı. Eyni zamanda Hadruta hücum əməliyyatlarının keçirilməsi üçün üstünlüklər əldə edildi. Bundan sonraki mərhələdə bizim digər rayon və şəhər, kəndlərimiz işğaldan azad olunmağa başladı. Cənab Prezident oktyabrın 4-də Cəbrayıla səfəri zamanı bu məsələləri ardıcıllıqla Azərbaycan və dünya ictimaiyyətinə çatdırdı. Cəbrayılda baş tutacaq quruculuq işləri ilə bağlı müəyyən layihələrin bünövrəsini qoydu. Prezident bu səfər vasitəsilə həm Ermənistana, həm də onun havadarı olan İrana açıq mesajla, Azərbaycan xalqının və dövlətinin fikrini və mövqeyini çatdırdı. Xocalı faciəsində birbaşa əli olan uşaq qatili Serj Sarkisyanın şəxsiyyəti, kimliyi, onun vəhşiliyi haqqında öz fikirlərini ifadə etdi. Digər tərəfdən isə bu gün onlara havadarlıq edən İranın son təxribatçı hərəkətləri ilə bağlı mesaj göndərdi. İranın niyə bizim qələbəmizi həzm etməməsi, niyə Araz boyu ərazidə hərbi təlimlərə başlamalarını, niyə hələ də Ermənistana müəyyən yardım etmələrini, yanacaq daşımalarını, qanunsuz Azərbaycan ərazilərinə qanunsuz keçmələrini, ümumilikdə İranın indiki mövqeyini çatdırmış oldu. Bir daha xəbərdarlıq edərək bildirdi ki, bizə qarşı olunan əsassız ittihamlar boş və mənasız bir şeydir. Faktları deyin və göstərin. Əks təqdirdə, Azərbaycana bütün haqsız ittihamlara yox deyirik. Azərbaycan torpaqlarına qarşı kiminsə buynuz çıxarmasını qəbul etmirik. Buna da gücümüz, qüdrətimiz çatır ki, lazım olan anda ordumuzla onlara cavab verə bilək. Cənab Prezidentin bu səfəri bir tərəfdən quruculuq, abadlıq işlərinin təməlinin qoyulmasının mərhələlərindən biri, digər tərəfdən bir daha Azərbaycan dövlətinin bütün bu məsələləri diqqətdə saxladığını, ən həssas, və şad günlərdə xalqının arasında olmasını göstərir. Digər tərəfdən isə yaranmış situasiyada cənab Prezident Ermənistanın həm indiki, həm də köhnə rəhbərliyinə və ona havadarlıq edən, islam qardaşlığından danışıb, bizə üz çevirib, erməniyə və erməni faşizminə dəstək verən İrana Azərbaycanın mövqeyini çatdırmış oldu"
Mehriban Xəlilli