Bakı Avropa İttifaqı ilə əlaqələri inkişaf etdirməyə hazırdır
Azərbaycan hər zaman beynəlxalq aləm, dünya dövlətləri üçün cəlbedici ölkə hesab olunub. Xüsusilə, bu cəlbedicilik müstəqillik əldə etdikdən, yeraltı və yerüstü sərvətlərə özümüz sahib olduqdan sonra daha çox büruzə verib. Azərbaycanın zəngin neft və qaz yataqlarına malik olması bu baxımdan Avropanı da Azərbaycana diqqətdən kənarda qoymayıb. Qoca qitənin enerji təhlükəsizliyinin təminatında ölkəmizin mühüm əhəmiyyət kəsb edən bir dövlət olduğunu nəzərə alan Avropanın siyasi təsisatları bu baxımdan regionda daha çox Azərbaycanla əməkdaşlığa üstünlük verirlər. Düzdür, müəyyən zaman kəsiyində həmin qurum və təsisatlardan ikili münasibətlər də görmüşük və ölkəmizə qarşı ədalətli yanaşma ortaya qoyulmayıb, lakin nəticə etibarilə rəsmi Bakının Avropa üçün lazımlı bir ölkə olduğu faktı özünü saxlayıb. Elə müntəzəm olaraq Avropadan Azərbaycana baş tutan səfərlər də bunu deməyə əsas verir. İndi isə qoca qitə əvvəlkindən də daha artıq şəkildə Azərbaycanla əməkdaşlıqda maraqlı görünür. Elə bu maraq ötən gün Azərbaycan Respublikasının Prezidenti İlham Əliyevlə Avropa İttifaqının ölkəmizdəki nümayəndəliyinin yeni təyin olunmuş rəhbəri Petr Mixalkonun görüşündə də özünü göstərdi. Məlumat üçün qeyd edək ki, görüş diplomatın öz etimadnaməsini Azərbaycan dövlət başçısına təqdim etməsi üçün baş tutmuşdu. Görüşdə tərəflər arasında müxtəlif sahələrdə əməkdaşlığa dair geniş fikir mübadiləsi aparıldı.
Sözügedən görüş barədə fikirlərini ifadə edən "Atlas" Araşdırmalar Mərkəzinin rəhbəri, politoloq Elxan Şahinoğlu deyib ki, Azərbaycanın Avropa İttifaqı üçün önəmli tərəfdaş olduğunu bildirən Petr Mixalko Brüsselin Bakı ilə iqtisadiyyat, innovasiyalar, ticarət, enerji, investisiyalar, infrastruktur və əməkdaşlıq kimi mühüm sahələrdə güclü tərəfdaşlıq şəraitində birlikdə işləməyə hazır olduğunu dedi: "Brüsselin Bakıdan daha bir gözləntisi var. Avropa İttifaqı ilə Azərbaycan arasında hərtərəfli sazişin imzalanması Brüsselin əsas prioritetidir. Bunu İlham Əliyevlə görüşdə Petr Mixalko da vurğuladı. Avropa İttifaqının nümayəndəsi bildirdi ki, yeni saziş ikitərəfli əməkdaşlığın genişləndirilməsinə kömək edəcək, eyni zamanda, Azərbaycan iqtisadiyyatının daha da güclənməsinə xidmət edərək onun çiçəklənməsi və şaxələnməsini artıracaq".
Mərkəz rəhbəri qeyd edib ki, sazişin imzalanması xeyli uzanıb: "Azərbaycandan başqa tərəfdaş ölkələr Avropa İttifaqı ilə assosiativ saziş imzalayıblar. Sazişin imzalanmasının uzanması Azərbaycanın maraqlarına cavab vermir, danışıqları intensivləşdirməyə ehtiyac var. İlham Əliyev Petr Mixalko görüşdə Avropa İttifaqı ilə əməkdaşlığı səmərəli və uğurlu adlandırdı. Azərbaycan prezidentinin sözlərindən aydın oldu ki, rəsmi Bakının Brüsseldən üç gözləntisi var. Birincisi, Azərbaycan Avropa İttifaqı ölkələrinə qaz nəqlini artırmaq istəyir. Bu Avropanın da maraqlarına uyğundur. Hazırda Avropa ölkələrinin bir çoxunda qazın qiyməti dəfələrlə artıb. Avropanın qaza tələbatı artıb. Brüsselin Avropanın əsas qaz təhçizatçısı Rusiya ilə münasibətlərində problemləri var. Odur ki, bu şəraitdə Azərbaycanın Avropaya Cənub Qaz Dəhlizi vasitəsilə qaz nəqlini artırması hər iki tərəf üçün faydalıdır. İkincisi, rəsmi Bakı Avropa İttifaqının yük daşımalarında Azərbaycanın dəniz və quru yollarından istifadə etməsini istəyir. Avropa İttifaqının prezidenti Şarl Mişel Bakıya son səfəri zamanı nəqliyyat dəhlizləriylə tanış olmuşdu. Azərbaycan nəqliyyat infrastrukturu şəbəkəsinin bütün vacib elementlərini tamamlayıb".
Elxan Şahinoğlunun sözlərinə görə, üçüncü məqam ondan ibarətdir ki,¸ rəsmi Bakı İkinci Qarabağ müharibəsindən sonra Avropa İttifaqının danışıqlarda fəal iştirakını arzulayır. "Əgər Avropa İttifaqı danışıqlarda fəal iştirak etsə bu, bir çox sahələrdə bizə kömək edə bilər" - deyən İlham Əliyev faktiki Brüsseli bölgədə sülh quruculuğunda iştirakına yaşıl işıq yandırıb. Beləliklə, rəsmi Bakı Avropa İttifaqı ilə əlaqələri inkişaf etdirməyə hazırdır. Bu Azərbaycanın milli və təhlükəsizlik maraqlarına uyğundur. Rəsmi İrəvan da Ermənistana böyük maliyyə ayıran Brüsselin fəallığına etiraz etməz".
Süleyman