Bölgədə yeni toqquşma baş verə bilər
Göründüyü kimi Rusiya Federasiyası Qarabağda öz üzərinə götürdüyü sülhməramlı missiyasını yerinə yetirə bilmir. ATƏT-in Minsk qrupunda tərəf saxlayıb Ermənistanın maraqlarından çıxış etdiyi kimi, indi də sülhməramlı missiya qismində eyni ssenarini davam etdirir. Əks təqdirdə bu günlərdə erməni hərbiçilərinin Zəngilanda yerləşən Dövlət Sərhəd Xidmətinin əsgərlərini atəşə tutmasına Rusiya tərəfi ciddi şəkildə reaksiya verər və İrəvana qarşı müəyyən addımlar atardı. Ancaq Rusiya sülhməramlıları təxribatçı erməni hərbiçilərini zərərsizləşdirmək əvəzinə düşmənin atəş zərbəsinə cavab verməyə hazırlaşan Azərbaycan tərəfinə təmkinli olmağı tövsiyə edib. Bir sözlə şimal qonşumuzun oyunu yenə davam edir.
Bəs görəsən erməni təxribatlarının artması fonunda bölgədə gərginlik yenidən pik həddə çata bilərmi? Yaxud Ermənistanın təxribat xarakterli addımları davam edəcəyi təqdirdə Azərbaycan hansı addımları atacaq və yenidən hərbi əməliyyatların başlaması mümkün görünürmü? Xüsusilə, bu məsələdə Rusiyanın mövqeyi maraqlıdır və rəsmi Moskva nə üçün Ermənistanın şıltaqlıqlarına ənənəvi üsulla göz yumur, onu 10 noyabr bəyanatının müddüəlarına əməl etməyə vadar etmir?.
Məsələyə münasibət bildirən "Atlas" Araşdırmalar Mərkəzinin sədri Elxan Şahinoğlunun sözlərinə görə, 10 noyabrdan bu yana ilk dəfədir ki, atəşkəsin intensiv pozulması barədə xəbərlər yayılır. Onun sözlərinə görə, Azərbaycan Dövlət Sərhəd Xidmətinin açıqlamasında bildirilir ki, Zəngəzur istiqamətindən dövlət sərhədində təxribatlar törədilib: "Zəngilan rayonunun Seyidlər kəndində yerləşən Dövlət Sərhəd Xidmətinin bölmələri, eləcə də bu istiqamətdə Ermənistan tərəfdə xidmət aparan Rusiya Federasiyasının Federal Təhlükəsizlik Xidmətinin Sərhəd Xidmətinin bölmələrinin yerləşdiyi mövqelər Ermənistan hərbi qulluqçuları tərəfindən atəşə tutulub. Açıqlamada o da vurğulanıb ki, hadisə ilə bağlı Rusiya sərhədçiləri azərbaycanlı həmkarlarına müraciət edərək təxribat törədən şəxslərin içkili vəziyyətdə olduqlarını bildirib və hadisəyə reaksiya verilməməsini xahiş ediblər. Rusiya tərəfinin müraciətini nəzərə alaraq, Azərbaycan sərhədçiləri tərəfindən təmkinlik nümayiş etdirilib və cavab atəşi açılmayıb. Hadisədən sonra təxribat törədən Ermənistan hərbi qulluqçularının ərazidən uzaqlaşdırılması barədə Azərbaycan tərəfinə məlumat verilib".
Mərkəz rəhbəri qeyd edib ki, açıqlamada Ermənistanın bir başqa təxribatına toxunulub: "Qubadlı rayonunun Şurnux kəndi istiqamətində 30-40 avtomobildə dövlət sərhədinə doğru hərəkət edən bir qrup şəxs erməni dilində Azərbaycan əleyhinə şüarlar səsləndiriblər. Ermənistan Müdafiə Nazirlyinin və ya Ermənistan Sərhəd Xidmətinin insidentlə bağlı açıqlaması yoxdur. Bunun əvəzinə Qarabağdakı erməni separatçıları belə bir açıqlama yayıblar ki, guya Azərbaycan ordusu Xankəndini və Əsgəranın iki kəndini atəşə tutub və guya bunun nəticəsində Xankəndidə hansısa evin damına zərər dəyib".
Elxan Şahinoölu hesab edir ki, beləliklə, bölgədə yenidən toqquşma ehtimalı artır: "Ermənistan hakimiyyəti ilə erməni separatçılarının birgə planı Azərbaycanla Rusiyanı üz-üzə qoymaqdan ibarətdir. Ancaq buna Rusiyadakı siyasi mərkəzlərin özü də rəvac verirlər. Ermənistanda görürlər ki, rəsmi Bakının Kremlə üsnvanladığı sualların sayı artıb. Rusiya ilə bağlı səslənən suallarımız bunlardır: "İsgəndər-M" raketini Azərbaycana kim və niyə atdı? Rusiya Ermənistan ordusunu kimə qarşı modernləşdirir? Rusiyanın Qarabağda 9 mayda planlaşdırdığı "hərbi parad"ın məqsədi nədir? Erməni separatçılarının lideri Araik Arutunyan növbəti dəfə Moskvaya niyə çağrılıb?"
Elxan Şahinoğlu qeyd edib ki, bu suallar cavablandırılmadığı kimi təxribatların sayı da artır: "Biz həm təxribatlara layiq cavab verməli, həm də qabaqlayıcı addımlar atmalıyıq. "Bizdən xahiş etdilər" ifadəsi ilə cəmiyyəti sakitləşdirmək çətindir. Ən maraqlısı odur ki, sərhəddəki insident barədə Ermənistanla yanaşı Rusiyadan da reaksiya yoxdur. Bunun əvəzinə Rusiya saytları Qarabağ separatçılarının son açıqlamasını yayıblar".
Məhəmməd
Olaylar.az