Ermənistanın qanunsuz məskunlaşma siyasətinin qarşısı qətiyyətlə alınmalıdır
Məzahir Əfəndiyev: “Bu həm də nüfuzlu beynəlxalq təşkilatların sülh çağırışlarına maneə yaratmaq məqsədi daşıyır”
Məzahir Əfəndiyev: "Bu həm də nüfuzlu beynəlxalq təşkilatların sülh çağırışlarına maneə yaratmaq məqsədi daşıyır"
Ermənistan bütün beynəlxalq hüquq normalarını pozaraq Azərbaycana qarşı işğalçılıq və təcavüzkar siyasətini davam etdirir. Azərbaycanın 20 faizə yaxın ərazilərini işğala məruz qoyan Ermənistan həmin ərazilərdə qeyri-qanuni məskunlaşma siyasətini də sürətləndirir. Azərbaycanın Kəlbəcər rayonu ərazisində yeni yolun çəkilişi, Livan və Suriyadan gətirilən erməniəsillilərin işğal altında olan Azərbaycan ərazilərində qeyri-qanuni olaraq məskunlaşdırılması deyilənlərin əyani sübutudur. Ancaq təəssüflər olsun ki, beynəlxalq aləm, xüsusilə də münaqişənin həlli ilə məşğul olan ATƏT-in Minsk Qrupu bütün bu qanunsuzluqlar, beynəlxalq hüququn kobud şəkildə pozulmasına görə Ermənistana hər hansı bir təzyiq göstərmir. Yerevanı qeyri-qanuni əməllərdən çəıkindirmək üçün hər hansı bir addım atmır. Belə bir arzuedilməz situasiya isə heç şübhəsiz ki, Azərbaycan cəmiyyətində ciddi narazılıq, Minsk Qrupuna inamsızlıq yaradır. Milli Məclisin deputatı Məzahir Əfəndiyev deyir ki, Ermənistan dövləti 30 ildən artıq bir müddətdir dünya ictimaiyyətinin gözü qarşısında təcavüzkar siyasətini həyata keçirir. Onun sözlərinə görə, Ermənistanın bu cinayətkar siyasətinin davamlılığını sübut edən faktlardan biri də budur ki, təkcə 20-ci əsrdə Azərbaycanlılar dörd dəfə - 1905-1906-cı, 1918-1920-ci, 1948-1953-cü və 1988-1993-cü illərdə erməni millətçiləri tərəfindən törədilən soyqrım və etnik təmizləmələrə məruz qalıblar: "27 ildən artıqdır ki, təcavüzkar Ermənistan aparılan danışıqlar prosesində həmişə qeyri-konstruktiv mövqedən çıxış edərək hər dəfə bu prosesi süni surətdə uzatmağa çalışır. Ermənistanda hakimiyyət dəyişsə də, bu dövlətin terrorçu mahiyyəti heç vaxt dəyişməyib. Belə ki, münaqişənin ədalətli həlli ilə əlaqədar konkret planlar müzakirə olunduğu bütün vaxtlarda Ermənistan tərəfi daim siyasi və hərbi təxribatlara əl atıb. Buna misal olaraq biz aprel döyüşlərini, Şuşada keçirilən qondarma "prezident seçkilərini", dövlət sərhədimizin Tovuz rayonu istiqamətində baş verən hadisələri göstərə bilərik. Bu proseslərin qarşısının alınmasında Azərbaycan öz prinsipial mövqelərindən bir addım belə geri çəkilməyib, Ermənistanın bütün həmlələrini dəf edərək onların təxribatlarına layiqli cavab verib".
Deputat bildirib ki, eyni zamanda qondarma "Dağlıq Qarabağ Respublikası" nda keçirilmiş qondarma "prezident seçkiləri"ndə də Ermənistan tərəfinin saxtakar və dağıdıcı mövqeyi bir daha isbat olunub: "Bildiyimiz kimi, başda ATƏT-in Minsk qrupunun həmsədrləri olmaqla ATƏT Parlament Assambleyası, Avropa İttifaqı və Avropa Parlamenti, Qoşulmama Hərəkatı, Türk Şurası, İslam Əməkdaşlıq Təşkilatı, NATO kimi beynəlxalq təşkilatlar bu "seçkilər"dən sonra bəyanatlar verərək bu "seçkiləri" tanımadıqlarını açıq-aydın şəkildə səsləndiriblər. Bununla da dünya birliyi Azərbaycanın suverenliyi və ərazi bütövlüyünü birmənalı şəkildə tanıdığını və dəstəklədiyini bəyan edib. Lakin, buna baxmayaraq qeyri-rəsmi mənbələrin məlumatlarına görə sentybrın 2-də qondarma quruma, separatizmə başçılıq edən "prezidentin" 100 günlük fəaliyyətinə dair konfransda hesabatla çıxış etməsinin nəzərdə tutulması, bir daha Ermənistan tərəfinin sülh danışıqlarında destruktiv mövqe nümayiş etdirdiyinə əyani sübutdur. Həmçinin, bu gün ATƏT-in Minsk Qrupunun həmsədrlərindən olan Rusiyanın münaqişə tərəflərini yenidən danışıqlar stolu arxasına dəvət etdiyi bir vaxtda Ermənistanın işğalçı rejimi tərəfindən Azərbaycanın işğal olunmuş ərazilərinə ayrı-ayrı ərəb dövlətlərindən, əsasən Livandan olan erməni qaçqınlarının məqsədli şəkildə yerləşdirilərək qeyri-qanuni məskunlaşma etmək və beynəlxalq miqrasiya qanunvericiliyinin tələblərini kobud şəkildə pozmaq Cənubi Qafqazda sülhün, əminamanlığın bərqərar olunmasını şübhə altına allır. Qeyd edək ki, bundan əvvəl də işğal altindakı ərazilərimizdə narkotiklərin qeyri-qanuni əkini, emalı və tranzitinin məhz əcnəbi miqrantlar vasitəsi ilə həyata keçirilməsinə dair sübutlar var idi".
Məzahir Əfəndiyev hesab edir ki, bütün bunlar yolverilməzdir və Ermənistanın qanunsuz məskunlaşma siyasətinin qarşısı qətiyyətlə alınmalıdır: "Bu həm də nüfuzlu beynəlxalq təşkilatların sülh çağırışlarına maneə yaratmaq məqsədi daşıyır. Bir daha dünya birliyini münaqişənin ədalətli həlli ilə bağlı Azərbaycanın sülhsevər səylərinin dəstəklənməsi istiqamətində əməli addımlar atmağa, Ermənistanın işğalçı rejiminə münasibətdə siyasəti sərtləşdirməklə BMT TŞ-nin qəbul etdiyi qətnamələrin tələblərinə qeyd-şərtsiz, bütövlükdə beynəlxalq hüququn norma və prinsiplərinə əməl etməsi üçün daha çox təzyiq göstərməyə çağırıram".
Süleyman
Olaylar.az