Azərbaycanda həyata keçirilən gənclər siyasəti uğurla davam etdirilir

Ölkədə gedən ictimai-siyasi proseslərdə gənclərin iştirakı və rolu danılmazdır. Hər bir ölkədə, cəmiyyətdə bu belə olsa da, Azərbaycanda qeyd etdiyimiz situasiya daha dinamik və daha çox nəzərə çarpan tərzdədir. Bu isə təbii ki, ölkədə həyata keçirilən uğurlu gənclər siyasəti ilə bağlıdır. Tam əminliklə deyə bilərik ki, əsası ümummilli lider Heydər Əliyev tərəfindən qoyulan uğurlu gənclər siyaasəti bu təbəqədən olan vətəndaşlarımızın ictimai-siyasi fəallığının artması, hətta onların dövlət qurumlarında təmsil olunmasına yol açıb. Bu gün istər dövlət qurumları, istər hökumət kabinetinə daxil olan ayrı-ayrı strukturlar, istərsə də qanunverici orqanda çoxlu sayda gənclər təmsil olunur. Və bu iştirakçılıq ildən-ilə daha da artır. Təsadüfi deyil ki, hələ ümummilli lider Heydər Əliyev zamanında qeyd edirdi ki, hər bir xalqın, hər bir millətin, hər bir ölkənin gəncləri onun həm bu günüdür, həm də sabahıdır, ümididir.

Milli Məclisin deputatı Anar Məmmədov da günümüzdə gənclərin ictimai-siyasi proseslərdə kifayət qədər aktiv olduğu qənaətindədir. Onun sözlərinə görə, bu gün Azərbaycan gəncləri öz fəaliyyəti ilə sübut edirlər ki, onlar ölkəmizin dəyərli vətəndaşlarıdır: "Müstəqillik və dövlətçiliyimizin möhkəmləndirilməsi, etibarlı gələcəyimizin təmin edilməsi gənclərin sosial-siyasi fəallığının yüksəldilməsindən çox asılıdır. Ümummilli lider Heydər Əliyev tərəfindən müəyyənləşdirilmiş və hazırda onun layiqli davamçısı Prezident İlham Əliyev tərəfindən uğurla həyata keçirilən dövlət gənclər siyasətinin aparıcı xəttini də məhz bu mühüm konsepsiya təşkil edir. Bütün bunlar bir daha təsdiq edir ki, dövlət gənclərə diqqət və qayğısını əsirgəməyəcək, həm onların üzləşdikləri çətinliklərin aradan qaldırılması, həm də cəmiyyətin bütün sahələrində fəal iştiraklarını təmin etmək üçün bütün zəruri tədbirləri həyata keçirəcəkdir".

Deputatın qənaətincə, həqiqətən də böyük xoşbəxtlik və böyük səadətdir ki, indiki gənclər müstəqillik dövründə formalaşırlar: "Bəzi hallarda indiki gənclərin ağlına da gələ bilməz ki, vaxtilə yaşadığımız ölkədə müəyyən məhdudiyyətlər var idi, azadlıqlar yox idi. Sərbəst fikir söyləmək, ayrı fikirdə olmaq, dünyanı görmək kimi hər bir insan üçün təbii olan imkanlar mövcud deyildi. Bu gün Azərbaycan öz tarixinin şərəfli və mürəkkəb bir dövrünü yaşayır. Azərbaycanın dövlət müstəqilliyinin və suverenliyinin qorunub möhkəmləndirilməsi, ərazi bütövlüyünün təmin edilməsi, o cümlədən işğal olunmuş torpaqlarımızın azad olunması, ölkə iqtisadiyyatının sürətlə inkişaf etdirilməsi, əhalinin sosial problemlərinin həlli, Azərbaycanın dünya birliyində öz layiqli yerini tutması yolunda görüləsi işlər hələ çoxdur. XXI əsrdə müstəqil Azərbaycanın inkişafı naminə görüləcək bu əzəmətli işlərin həyata keçirilməsinin əsas ağırlığı və məsuliyyəti isə bugünkü gənclərin üzərinə düşür".

Anar Məmmədovun sözlərinə görə, sevindirici haldır ki, gənclər də öz növbəsində dövlət qayğısını daim hiss edərək nailiyyətləri ilə onlara göstərilən etimadı layiqincə doğrultmağa çalışırlar: "Bu yüksək münasibətə cavab olaraq Azərbaycanın parlaq gələcəyinin təminatçısı olan gənclər bütöv və müstəqil Azərbaycan naminə bütün güclərini səfərbər edir, Vətənin inkişafı üçün səylə çalışır, öz siyasətində onlara arxalanan Prezident İlham Əliyevin uğurlu daxili və xarici siyasətini dəstəkləyirlər. Tam inamla demək olar ki, ölkəmizdə gənc nəslin problemlərinin həlli, onların cəmiyyət həyatında layiqli təbəqə kimi iştirakının təmin olunması üçün həyata keçirilən bütün zəruri tədbirlər Azərbaycan gəncliyini daha işıqlı sabaha aparacaq".

Deputat Konul Nurullayeva da deyir ki, günümüzdə gənclərə böyük diqqət və qayğı göstərilir, onların sosial, iqtisadi və siyasi problemlərinin həlli sahəsində tədbirlər görülür, cəmiyyət həyatında layiqli təbəqə kimi iştirakları təmin edilir: "Azərbaycanda həyata keçirilən gənclər siyasəti bugün uğurla davam etdirilir və gənclərin təşkilatlanması əsas məqsədlərdən biri kimi qarşıya qoyulub. Nəzər yetirsək görərik ki, sosial həyatın bütün sahələrində gənclər əksəriyyət təşkil edir və bu digər sahələrə də yayılmaqdadır". Deputat deyib ki,  bugünədək gənclərin vətənpərvərlik tərbiyəsi, onların mənəvi inkişafı, xarici ölkələrdə təhsil alması istiqamətində bir çox işlər görülüb, və onlar da öz növbəsində milli-mənəvi dəyərlərimizi, dövlətçiliyimizi, adət-ənənələrimizi qorumaq üçün əllərindən gələni əsirgəmirlər.

Məhəmməd