Oqtay Əsədov İtaliya Senatının sədrini qəbul edib
Milli Məclisin Sədri Oqtay Əsədov İtaliya Respublikası Senatının sədri xanım Maria Elizabetta Alberti Kasellatinin başçılıq etdiyi nümayəndə heyəti ilə görüşüb.
"Olaylar" xəbər verir ki, spiker nümayəndə heyəti üzvlərini salamlayaraq İtaliya Senatı sədrinin ölkəmizə ilk səfərinin əlaqələrimizin daha da inkişafına öz töhfəsini verəcəyinə inamını ifadə edib. Söhbətdə bildirilib ki, İtaliya ölkəmizin Avropada və dünyada mühüm tərəfdaşlarından biridir. Müstəqillik illərində İtaliya ilə sıx dostluq telləri qurulub. Dövlət başçılarının qarşılıqlı səfərləri zamanı aparılan danışıqlar münasibətlərimizin daha da dərinləşməsi üçün yaxşı imkanlar yaratdıb. Azərbaycanın Birinci Vitse-prezidenti xanım Mehriban Əliyevanın ötən ay İtaliyaya səfəri zamanı Azərbaycan Xalq Cümhuriyyətinin 100 illiyi ilə bağlı İtaliya Senatındakı konfransda iştirakı və səfər çərçivəsində keçirilən tədbirlər iki ölkənin bir-birinə verdiyi qarşılıqlı dəyərin bariz nümunəsidir.
Bu günədək ölkələrimiz arasında 44 sənəd imzalanıb. Biz 2014-cü il iyulun 14-də İtaliya Senatında "Strateji tərəfdaşlıq haqqında" Birgə Bəyannamənin qəbul edilməsinə böyük əhəmiyyət veririk. Heç də təsadüfi deyildir ki, İtaliya Avropada həm də ölkəmizin ən mühüm ticarət tərəfdaşıdır. Bu gün Azərbaycanda müxtəlif sahələrdə 50 İtaliya şirkəti fəaliyyət göstərir. Söhbətdə Sədr qeyd edib ki, Avropanın enerji təhlükəsizliyinə əhəmiyyətli töhfə verən Azərbaycanda təsdiq olunmuş 2,5 trilyon kubmetr qaz ehtiyatı vardır. Bu, 100 il ərzində bizə və tərəfdaşlarımıza kifayət edəcək səviyyədədir. Gələcəkdə TANAP və TAP boru kəmərləri Azərbaycanın təbii qazını Avropa bazarına çıxaracaqdır. Ölkəmiz Qərblə münasibətlərdə etibarlı tərəfdaş olduğunu təcrübədə dəfələrlə nümayiş etdirmişdir. Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars kimi iri transmilli layihələr bunun əyani sübutudur.
Səmimi qəbul üçün minnətdarlığını bildirən İtaliya Respublikası Senatının sədri xanım Maria Elizabetta Alberti Kasellati ölkəmizə səfərindən və burada keçirdiyi görüşlərdən məmnun qaldığını söylədi. O, parlamentlər səviyyəsində əlaqələrin gələcəkdə də inkişaf etdirilməsinin vacibliyinə toxunaraq, hər iki ölkə deputatlarının mütəmadi görüşlərinin əhəmiyyətli olduğunu dedi.