Deputatlarımız Strasburqa səfər ediblər

Milli Məclisin Avropa Şurası Parlament Assambleyasındakı daimi nümayəndə heyətinin üzvləri Rafael Hüseynov, Rövşən Rzayev, Elxan Süleymanov, Sevinc Fətəliyeva, Qənirə Paşayeva, Sahibə Qafarova, Fazil Mustafa, Elşən Musayev, Sabir Hacıyev, Vüsal Hüseynov və Müslüm Məmmədov AŞPA-nın qış sessiyasında iştirak etmək üçün yanvarın 24-dən 30-dək Strasburqda səfərdə olacaqlar. Bu barədə parlamentdən verilən məlumata görə, sessiyanın birinci günündə AŞPA-nın yeni prezidenti və vitse-prezidentləri seçiləcək, bir sıra təşkilati məsələlərə baxılacaqdır. Deputatlarımız gündəlikdə duran məsələlərlə bağlı çıxışlar edəcəklər. Xatırladaq ki, iclasda "Dağlıq Qarabağ və Sərsəng su anbarı" və "Azərbaycanın sərhədyanı ərazilərində yaşayan əhali qəsdən sudan məhrum edilib" adlı iki məruzə ətrafında müzakirələr aparılacaq, qərar qəbul ediləcək. Sessiya çərçivəsində Avropada miqrant böhranı, Suriya və İraqda xarici döyüşçülər, Kosovodakı vəziyyət, Avropa standartlarını və dəyərlərini qorumaqla beynəlxalq terrorizmlə mübarizə və digər mövzularda fikir mübadiləsi aparılacaq.

Təklifinizi, şikayətinizi bizə yazın. Sizi dinlərik. 050 333 88 00