“Bülent Ərsoy həyatıma həyat qatdı”

“Hələ də ürəyimə yaxın olan bir qız tapmamışam. Evlənməyi düşünürəm. Hər bir insan ailə qurmaq istəyər”

Xalq artisti Aygün Kazımova ilə Azərbaycanda oxuduğu duetləri ilə gündəmdə olan Türkiyənin "Popstar Alaturka" yarışmasının birincisi Gökhan Erolun "Qafqazinfo"ya verdiyi müsahibəsini təqdim edirik:

- Bir ara yaradıcılığınızda daha aktiv idiniz? İndi nə işlə məşğulsunuz?
- Hal-hazırda Türkiyədəyəm. Təzə mahnılar seçirəm, yeni layihələrlə birgə dönəcəyəm Bakıya.

- Siz Azərbaycanın xalq artisti Aygün Kazımova ilə duet oxumusunuz. Bəs niyə davamı gəlmədi?
- Aygün xanımla duetlərimiz çox uğurlu alındı, düşünürəm ki, davamı gələcək... Tez- tez oxuyub camaatı bezdirmək istəmirəm.

- Aygün Kazımova sizi Sinan Akçıla dəyişdi, bu barədə məlumatınız var?
- Bəli var, Aygün xanımla bizim dostluğumuz möhkəmdir, sadəcə iş deyil... Biz hər zaman hər işdə onu dəstəkləyirik.

- Bəs siz Aygün xanımı Azərbaycanda kimə dəyişmək istəyirsiniz? Məsələn Röyaya?
- Mən yetərincə duetlərimi oxumuşam, Aygün xanımı heç kimlə dəyişməmişəm və dəyişmərəm də. Hər sənətçinin öz yeri var.

- Deyilənə görə, Azərbaycan şou-biznes əhli sizi burada işləməyə qoymadılar və siz də bu səbəbdən inciyib qayıtmısınız?
- Elə bir şey yoxdur. Ha, ha, ha... Əgər məni burda işləməyə qoymasaydılar mən onda niyə qayıdıram yenidən Bakıya?

- Niyə görə Azərbaycan şou-biznesinə qatılmaq istədiniz və sonradan niyə Türkiyəyə qayıtdınız?
- Türkiyəyə qayıtmadım, mənə sadəcə olaraq, Türkiyədən iş təklifi gəldi ona görə getdim. Həm də albomum üçün mahnıların hazırlığı lazım idi. Azərbaycan mənim doğma vətənimdir.

- Bəs Azərbaycan şou biznesi ilə Türkiyədəki fərqli və oxşar cəhətləri sizcə, nədədir?
- Türkiyəni az çox siz də bizim qədər izləyirsiniz və bilirsiz. Məncə bu sualın cavabını sizlərdə bilərsiniz...Hər şey göz qabağındadır, müğənniləri tanıyırsınız, serialları da izləyirsiniz...

- Bület Ərsoy sizin səsinizə heyran olduğunu deyib. Bu sözün sizin həyatınızda nə kimi rolu oldu?
- Bülent xanım doğrudan da mənim səsimi çox bəyənir və hər zaman mənə dəstək olub. Mənim müəllimimdir, ustadımdır. Onun sözü mənim həyatıma həyat qatdı. Sadəcə bu qədər!

- "Popstar Alaturka" Ebru Gündəşlə bir səhnəni paylaşdınız. Ebru xanımdan sizə hansısa dəstək gəlib?
- Ebru xanımdan mənə nə dəstək gələcək ki... O sadəcə səsimi bəyəndiyi üçün mənə hər zaman yüksək qiymətlər verib.

- Bundan sonra Azərbaycan səhnəsində yenidən görünəcəksiniz?
- Mən vətənim Azərbaycana gəlməliyəm bu yaxınlarda. Yenidən Azərbaycan səhnələrdə görünəcəyəm.

- Şəxsi həyatınızda danışardınız, Subaysınız?
- Bəli subayam.

- Evlilik barədə düşünürsünüz?
- Hələ də ürəyimə yaxın olan bir qız tapmamışam. Evlənməyi düşünürəm. Hər bir insan ailə qurmaq istəyər.

- Niyə şou biznes adamları gec evlənir və ya evlənmirlər?
- Gec ailə qurmağın müsbət cəhətləri də var. Yəqin onlar da mənim kimi ürəklərinə yatan adamı tapa bilmirlər ona görə.