“Oxu tar” M.Müşfiq mükafatı təqdim edilib

1 oktyabr 2018-cı il tarixində R.Behbudov adına "Mahnı teatrında" Azərbaycan Respublikası Mədəniyyət Nazirliyin, Azərbaycan Televiziya və Radio verilişləri QSC-nin, Mədəniyyətşünaslıq üzrə Elmi-Metodiki Mərkəzin dəstəyi ilə "Könüllülər kitabxana" İB-nin, Cabir Novruz Mədəniyyət fondunun, Yasamal rayonu 18 saylı Müşfiq adına orta məktəbin birgə təşkilatçılığı ilə Azərbaycan ədəbiyyatının inkişafında parlaq səhifələr qoymuş, klassik və romantik şair Mikayıl Müşfiqin 110 illik yubileyinə həsr olunmuş xatirə gecəsi keçirilmişdir.

Tədbirdə Azərbaycan Yazıçılar İttifaqının katibi, yazıçı Çingiz Abdullayev, xalq şairi Nəriman Həsənzadə, əməkdar jurnalist, pedaqogika üzrə fəlsəfə doktoru Qafar Əsgərzadə, Cabir Novruz fondunun prezidenti, professor Cavanşir Qurbanov və digərləri iştirak ediblər.

Qeyd olunub ki, şairin lirik duyğu və hisslər, gözəl musiqi duyumu onu nəğməkar şair kimi də şöhrətləndirib. Mütərəqqi dünya və rus poeziyasına yaxından bələd olması, onu mükəmməl, dərində bilməsi Muşfiqi ədəbi mühitdə bədii tərcümənin nahir ustadı kimi də tanına bilib.

Mədəniyyətşünaslıq üzrə Elmi-Metodiki Mərkəz tərəfindən iştirak edən Təbliğat və statistik araşdırmalar şöbəsinin müdiri M.Müşfiq və C.Cabbarlı mükafatı laureatı Sənan Talıbov çıxış edərək Mərkəzin rəhbərliyi adından bütün iştirakçıları salamlamış Mikayıl Müşfiqin yaradıcılığından bəhs etmişdir.

Tədbirdə xalq şairi Nəriman Həsənzadə, "Şöhrət" ordenli şairə Ofeliya Babayeva, professor Firudin Qurbansoy Müşfiq poeziyasının tükənməz çeşmə olduğunu bildirərək şairin bir birindən gözəl əsərlərini dilə gətirmişlər.

Gecənin sonunda Cavanşir Qurbanov Müşfiq irsini yaşatdıqlarına və təbliğ etdiklərinə görə Zeynəb Xanlarovaya, Sənan Talıbova, Ofeliya Babayevaya, Firudin Qurbansoya, Qafar Əsgərzadəyə Cabir Novruz mədəniyyət fondu tərəfindən təsis olunmuş "Oxu tar" M.Müşfiq mükafatı təqdim edilmişdir.